Oshungi yuusiku yaMayola mOutapi oya gongele oshimaliwa N$500 000, netompelo lyokuyambidhidha oshowo okuhumitha komeho omalukanda mOutapi, sha ningwa mehuliloshiwike.
Omalukanda ga yooloka mOutapi oga taalela onkalo ondhigu, sho kaage na omayakulo ge li popepi oshowo ngoka taga vulu okuhwepopaleka onkalo, onkene oshimaliwa shoka osha gongelelwa okuyambidhidha onkalo ndjoka.
Omuprima Saara Kuugongelwa-Amadhila okwa popi esiku ndyoka ta ti, omalelo goondoolopa ogo ge na oshinakugwanithwa shokulundulula oshowo okugandja omauwanawa kaakalimo oshowo kaanangeshegafa momindhingoloko dhawo.
“Onda nyanyukwa nokupandula elelo lyondoolopa yOutapi sho lye ya po nedhiladhilo ndika okupitila moprogalama yoMayola okugongela oshimaliwa shoka,” ta ti ngaaka.
Ta ti, oshimaliwa shoka osha gongelelelwa okuhumitha komeho oshowo okulundulula onkalo yaakalimo mOutapi.
“Shika otashi ka ningwa ashike uuna omaupyakandhi ga taalela aakalimo mboka ga kandula po oshowo oku ya etela omayakulo ya pumbwa,” ta ti ngaaka.
Ta gwedha po ta ti, omayakulo ngoka itaga ka lundulula ashike onkalo yaakalimo, ihe ohaga humitha nokukokeka eliko mondoolopa.
Esiku ndyoka ombelewa yOmupilima oya uvaneke okugandja oshimaliwa N$5 000.
Oshimaliwa oshinene osha gandjwa kehangano lyoNamWater, lya gandja N$200 000, taku landula Outapi town Council noshimaliwa N$100 000 oshowo ehangano lyoRani lyu uvaneke okugandja N$30 000.
Omahangano nomandiki galwe gomoshitopolwa shaMusati nago oga uvaneke okuyambidhidha naashoka ge na po.
Mayolo gondoolopa Outapi Selma Asino Shaumbwako esiku ndyoka okwa ti oya hala okulundulula onkalo yaakalimo yawo mboka ye li momalukanda.
“Otu na omalukanda gatano agehe kumwe, ihe onkalo itayi hokitha nando. Okomalukanda ashike ge li gaali, ge na omayakulo gamwepo ihe haagehe,” ta ti ngaaka.
Ta gwedha po ta ti, omalukanda ngoka agehe ogena aantu yeli 2000 kumwe, onkene oya hala okuya etela omayakulo popepi.
“Elelo lyondoolopa lyOutapi olya kambadhala okuhwepopaleka omalukanda ngoka notali tsikile. Otwa tengeneke okulongitha N$400 000 oku eta po opayipi yonyata,” ta fatulula ngaaka.
Mayola esiku ndyoka okwa ti, shoka oye na oku shi ninga oshoka aantu momalukanda otaya ende taya indjipala, sho taya ende yu uka moondoolopa okukonga uuhupilo. vkaapanda@nepc.com.na