Ovakwashiwana vaAngola tava landifa omahooli kOshikango paumbudi, tava ti eengeshefa davo ode va e tela omauwa mahapu no kave na efiku va efe po ongeshefa yoku ngungula.

Ovaangola ova hokolola tava ti ngeenge ova xulifa po okulandifa omahooli otava kala va dengwa koluhepo nondjala nonghalo otai ke va fininika vaka longe oimbuluma, unene yokunyeka ko omaliko ovanhu.

Pefimbo Kundana a popya nOvaangola ova hokolola tava ti paife oimbuluma oya shuna pedu komudingonoko waShikango shaashi ove li pyakidila nokulandifa omahooli.

Umwe womakainhu hava landifa omahooli okwa lombwela Kundana ta ti ovashingi veelefa ove hole okulanda omahooli ku vo shaashi oku na ombilixa onghee naashi oha shi vape omukumo opo va kale tava landifa nondjungu.

“Unene tuu efimbo longula ohatu mono ovashingi veelefa vahapu tava pula omahooli manga ina ka tameka oilonga yavo yomopate,” ta ti.

Omulumenhu umwe naye a landifa omahooli okwa ti no nande hava kala tava tewatewa kopolifi efimbo keshe itava teka omukumo wokulandifa omahooli shaashi navo otava kongo ouxupilo ngaashi naaana ovanhu vakwao navo hava landifa oinima ya yooloka kOshikango.

“Ohatu indile opolifi yaNamibia opo i xulife po okukala tai tu taata ngeenge hatu landifa omahooli shaashi omahooli oo hatu landifa ina vakwa ngaashi ovanhu vamwe hava landifa oinima ya vakwa,” ta hokolola. Ovaangola ovati ngeenge ova xulifa po okulandifa otava kala va kwatwe komhepo yokunyeka ovanhu omaliko avo shaashi itava kala va li tava mono oyuuyemo.

Umwe womunambelewa wopolifi okwa lombwela Kundana ta ti ka shi pu okukala tava konakona Ovaangola tava landifa omahooli kOshikango shaashi Ovaangola paife ova ninga vahapu ashike ovapolifi ova shona hava kala ponhele opo.

“Ovaangola paife ova ninga vahapu tava landifa Omahooli. Omafimbo amwe oha pa kala ashike pena omupolifi ouke ta longo onghee eshi ta ende auka kombinga ikwao vo Ovaangola otava lotoka va uka keembinga da yooloka oku kuna eetuwa de uya okunwefa omahooli,” ta hokolola.

Okwa yelifa ta ti Ovaangola vamwe ohava kala va hala okudenga ovapolifi ngeenge tava lombwela vaha landife vali omahooli.

“Ovaangola vamwe ohava kala vena omakatana, eembele nomamanya va hala okuponokela ovanambelewa vopolifi ile ovakwashiwana,” ta hokolola. Pefimbo ovatoolinghundana kwa li tava longele kOshikango tava faneke Ovaangola eshi tava landifa omahooli ova ponokelwa nomamanya kOvaangola. Ovaangola ova tameka tava umbu ovatoolinghundana nomamanya shaashi ina hala okufanekwa eshi tava landifa omahooli.

Umwe womukalimo womOshikango ha ka tala oinima moAngola yokulandifa okwa hokolola ta ti ova ninga oihakanwa yokunyekwa omaliko avo kOvaangola ngeenge tava di moAngola.

“Ngeenge tuli mondjila yokudja moAngola ohatu hange mo Ovaangola ve kwete eembele nomakatana tave tu pula oshimaliwa noshoyo omaliko etu,” ta hokolola.

Eshi a kwatafana naKundana kakukutu wopolifi moNamibia Inspector General Joseph Shikongo okwa kunghilila opolifi opo i kale tai tataa Ovaangola tava landifa omahooli moNamibia shaashi ouministeli weemina noikwanghono ina u pitika omahooli a landifwe paumbudi.

“Ovapolifi ove na ashike okutwikila okukonakono oimbuluma tai ningwa kOshikango shaashi oshi li oshinakuwanifa shavo shokutula po elandulafano,” Shikongo ta ti. – fhmalwa@nepc.com.na