Kansela woshikandjohoololo sha Ruacana Andreas Shintama ota hokolola ta ti eenhauki edi di li kEtunda oda kwatwa komukifi wonghana.

Okwa ti unene tuu ounona ovo vamwe tava hepekwa komukifi wonghana shaashi okwa didilikwa ounona vahapu va kwatwa.

Pefimbo a ninga eenghundafana naKundana Shintama mEtitatu okwa popya ta ti eenhauki edi opo de ya kEtunda odo dimwe unene da ninga oihakanwa yomukifi wonghana.

Okwa yelifa ta ti eenhauki edi da kala pEtunda okudja ketameko lomudo ou inadi kwatwa konghana shaashi oda kala di li mefiloshisho loikulya.

“Ovakainhu ve lihumbata navo otava hepekwa komukifi wonghana, omo nokuli oomeme vahapu va ninga oipute komavele sha etwa konghana. Ngeenge omukainhu okwa pulumufa eshi otashi ka kala oupyakadi kokaana kaye shaashi ita ka dula okunyamifa,” Shintama ta ti.

Kansela okwa ti eenhauki edi oda kala dina omukifi wonghana oule wemweedi nhee paife.

Okwa popya ta ti ounona paife ove na ashike oshipa shitoka tashi di omakaka, molwoonghana tai hepeke omalutu avo, omanga vamwe ova ninga omanyutu kondjala.

Kansela okwa ti Ovaangola vamwe onghee tava twikile nokumbolokotela kEtunda oku ku na vakwao, naashi otashi wedele omwaalu weenhauki u kale wa uka pombada efiku nefiku.

“Ohandi indile moshiwana opo shi yambidida eenhauki nomiti, omaadi, neefewa hadi dulu okupanga omukifi wonghana opo eenhauki di kale da veluka omukifi ou,” Shintama ta ti.

Okwa ti kukeshe ou e na ehalo lokuyambidida eenhauki noikwafifo yokupanga onghana na kwatafane nombelewa yaye ile nombelewa yangoloneya.

Okwa weda po ta ti eenhauki oda pumbwa omakwafo ngaashi unene oikulya onghee okwa indila oshiwana opo shi twikile nokukala tashi yambidida eenhauki noikulya.

“Onghana ohai etwa kondjala nekako onghee hano ngeenge otwa kala atu yambidida eenhauki noikulya eshi otashi kelele ounona va hakwatwe komanyutu nonghana,” Shintama ta ti.

Eenhauki oda didilikwa da mbobolokela moNamibia petameko lomudo ou molwoshikukuta eshi shi li poushiindalongo Angola.

– fhamalwa@nepc.com.na