New Era Newspaper

New Era Epaper
Icon Collap
...
Home / Ovahangwena va ninga omailikano omuhanga okukeelela oimbuluma neehombo tadi teka

Ovahangwena va ninga omailikano omuhanga okukeelela oimbuluma neehombo tadi teka

2023-04-03  Festus Hamalwa

Ovahangwena va ninga omailikano omuhanga okukeelela oimbuluma neehombo tadi teka

Eengeleka da yooloka domoshitukulwa shaHangwena oda ninga omailikano omuhanga, oo kwa li a ningwa nelalakano okualikanena oiponga yomeendjila nomafyo, omadipayafano nomahepekafano, ekufemo lomadimo, omakwatonghonga, oushenge, omalimangeleko, eehombo tadi teka noshoyo omikifi dihena epango.

Omailikano okwa ningwa mexuliloshivike mEenhana omo kwa li ovafitaongalo va dja keengeleka da yooloka va hangana noshiwana mwakwatelwa ovaleli vopamufyuululwakalo.

She li kwatelela keelopota dopolifi moshitukulwa shaHangwena, ounona novakainhu ova ninga oihakanwa yokukwatwa onghonga kovalumenhu vovapambele wavo ile hava di momikunda davo.

Omahepeko omomaumbo nayo oku li ta dana onghandangala mOhangwena unene tuu kovaholafani.

Omukulupe weedula 65 oku li modoolongo konima eshi a kwatwa po molwashi vati a denga katekulu kaye kokamati noikuni noka monifa oshiponga.

Omukwateli komesho noku li omunashipundi womuhanga womailikano moshitukulwa shaHangwena, omufitaongalo wongeleka Eenhana elcin Jermia Kashululu okwa ti ova didilika moshitukulwa shaHangwena ha mu longwa oimbuluma ya yooloka noshoyo oiponga yomendjila ya londa pomboda.

Onghee naashi oshan eta opo va ninge omuhanga womailikano moshitukulwa shaashi omupyakadi oha kandulwa po ashike tashi pitile momailikano.

“Ka pena oupyakadi hau kalele, kalunga oha udu omailikano ngeenge ovanhu tava ningi omailikano onghee osha omailikano aa okwa fimana shaashi ota ka eta elunduluko la kula moshitukulwa shaHangwena,” Kashululu ta ti.

Okwa weda po ta ti omuhanga womailikano ou ota twikile okuningwa keenhele da yooloka moshitukulwa onghee okwa kumaida oshiwana mOhangwena opo shi kale tashi holoka momwaalu muhapu pefimbo lomailikano.

Okwa kumaida oshiwana opo shi kale tashi kwatafana novafitaongalo ngeenge she li hanga shi li momapyakadi a yooloka.

Kashululu okwa hokolola ta ti omuhanga womailikano owa totwa momudo 2013 omo va kala noku ninga omailikano ashike okwa kala a tulwa monga mokafindo molwo ombuto yoCovid-19 oyo kwa li ya ngabeka omwaalu wengudumano lovanhu.

fhamalwa@nepc.com.na


2023-04-03  Festus Hamalwa

Share on social media