New Era Newspaper

New Era Epaper
Icon Collap
...
Home / Ovahimban ge xoas tsî khomaisa ǁkhā­khāhesa go ū!oa

Ovahimban ge xoas tsî khomaisa ǁkhā­khāhesa go ū!oa

2021-07-06  Staff Reporter

Ovahimban ge xoas tsî khomaisa ǁkhā­khāhesa go ū!oa

Uaripi Katjiukua

 

 ǀNî ǁanin Ovahimba ǀhûhâsib din Tsoaxaubams !nân ge ǁî!nāpe !ereamxasiba ge ū, Kaoko!hūba (nēsi Kuneneb ti a ǂansab) xu ge doeǀkhī huri-am!ās ǁga īǁkhāsib !gâi ûiba hōs dib !aroma, Ovahimba khoena khomais tsî xoasa ǁkhāǁkhāsa. “Sida khoen ge nēpa ra hā, !hao!nāsi !omkurusaxūnan nî !āǁîn tsî !narisarima-aon ai ǁamaxuse, xawen ge īge ǁaegu !nâ ǁkhā-khāsens !ēsa hō tama hâ i tsîn ge ǁîna ǀgaisa ǁgoaǂuis ǁnâuǂharugu tsî ǂganǀgaugu ǂnamipe ǁama-aon ǀkha hōgus disa ūhâ,” tib ge ge aitsama māsenxase ǁîna ra ǁgau!nâ Tinda Ngaveriameba ge mî. ǁNâuǂharugus !gomsib hâ amagan ge ǁîna ǀhûhâsib khoen tsî !narisarima-aon ǀkha a ǁnâuǂharugu ǁoa tsîn ge khoena xu ǀonaǂuisen tsî ra ǀguri hâ tsî nēs xa ra !aromahese dītsân ra ǂharugun !nâ !gâi!gâ tama ra i. Ngaveriameb hîa a 27 kurixab ǁîb di xrat 12 Mureti ǀGapi Skoli Opuwos !nâ, Kunene ǀkharib !nâ mâb rawa gw dītoa tsî a ǀgui ǁnā aitsama māsenxase nē ǁgau!nâde Ovahimba khona ra ǁkhāǁkhān diba. ǁÎn ge Tsoaxubams !ās di DRC ǁanǁguib !nâ ǁkhāǁkhā!nā-omde !naon, karosa omūkartonn tsî palmǂgonagu ǀkha omhâ tsî ǁnāpa nē khoena Hurigowab, Otjiherero gowab tsî !Gôan tsîna ra ǁgau!nâ. Nē ǁkhāǁkhādi ge ǁkhâ-e !kharu tsî ge tsoatsoa, ǁnāpan ge nē 3 !nona aitsama māsenxa ǁgau!nâ-aona ǁîn di ǂâiǀgauba Erongo ǀkharisi ǁgau!nâs direktorats ǀkha ǀgoragu, mā-amsa !khō!oa tsî ǁnāpa xu khomaiǂkhanin tsîn ǀkha a hui!nâhese. Nē ǁgau!nâdi sîsentsoatsoas ge ǁkhāti ǁgau!nâs mâisas ai!â hâ ǁkhāǁkhāsens !ereamsa Erongo ǀkharib !nâ tani hâs, Paulina Nakafingos xa ge ǁawoǁawohe. Pujaundja Kavaris, ǁamaxu-aos, hîa ǁîs tsîna nē ǁkhāǁkhāde ra ǁhao!nâs ge Otjiherero gowab !nâ gere ǁgâiǂuisen mâtikōses ǁîsa a māsenxa !khaisa !Gôana ǁgau!nâhesa îs ǁama-aon ǀkha ǂhanuse marin !harib ai sîsen ǁkhā, !gôasa ǂans kaise ǂharugub !nâ a ǂhâbasa amaga. Nē khomai, xoa tsî !gôas projeks di ǂâis ǀkha ge tsoatsoan di ǀguib, Daniel Mupuruab, !nāsase Tjikuum ti ǀgui a ǂansab ge ge mî, ǁîn di ǁkhoreb nē ǁgau!nâde hoa ǀhûhâsib ǁanin !aroma dīsa, Ovahimban ǀguin ose. Mupuruab ge ǁîb di sekondere ǁgau!nâsa dītoa tsî College of the Arts Botswanab dis tawa -ǁîb ǀgapi ǁkhāǁkhāǂuisensa ge dītoa, ǁnāpab ge Namibiaba !oa 2011ǁî kuri a oaǀkhī tsî !hūǁîsisa !khō!oase. Nē ǁgau!nâ-aon ge !gâi ǂgaoxa ǀhûhâsib ǁanina ra ǂan in ga ǂnû-ai!naon, xoa-ai!naon, maskerdi tsî hâga huisenūxūn nē -ǁgau!nâsa a hui!nâ ǁkhān ǀkha a huihesa. 


2021-07-06  Staff Reporter

Share on social media