Ngaashi naana kwa didilikwa kutya ouministeli wehongo owa kanifa ovahongifikola novakunhuluhufikola va fya kombuto yoCovid-19, minista wehongo Anna Esther Nghipondoka ota kunghulile ovahongifikola ava hava longo oshilongwa shexungomwenyo opo va yandje omayakulo exungomwenyo kovanafikola pefimbo ovo vamwe va kanifa ovahongifikola vavo mefudo. 

Nghipondoka okwa ti oshi kakala shidjuu kounona vofikola kwali va ika ovahongi vavo ndele paife eshi tava ka tameke po ofikola opo tava ka dimbuluka kutya mboli omuhongi ile omukulunhufikola wavo okwa xulifa. 

Ta ti eshi otashi kapiyaneka omadiladilo ounona vofikola pefimbo loshikako shavo shaxuninwa.

Nghipondoka ta ti ovahongifikola nava kwashipaleke kutya ovanafikola ava ova mona exungomwenyo lopamadiladilo.

“Nashi kale oshinakuwanifa shomuhongi keshe opo a kale ta kwafele ovanafikola ngeenge veli monghalo yoluhodi. Ombuto yoCovid-19 oya denga oshikongo shehongo pomutima shaashi mopaife ngaha eendodo dimwe ota di ka kala di e na ovahongifikola, omanga eefikola dimwe nado ota di ka kala di e na ovakulunhufikola,” Nghipondoka ta ti.

Okwa kunghulila ovanafikola, ovahongifikola, nosho yo ovanailonga aveshe vokeefikola opo va kale tave liufa komilandu doCovid-19 efimbo keshe keefikola.

Nghipondoka okwa yelifa ta ti eendodo ngaashi 7, 9, 10, 11, 12 otadi kalongwa keshe efiku shaashi ovanafikola veendodo edi ove li unene konima noilongwa yavo, omanga oku dja peendodo do pedu ota di kala ashike ta dii keetundi omafiku amwe po moshivike.

Minista ta ti ovahongifikola nava longe noudinini opo va dule oku pitifa ovanafikola noitwa, ina va teka omukumo.

Okwa weda po ta ti ovahongifikola nava twikile nokukala tava i kotunhila yombuto yoCovid-19 opo va kale vena eameno la wana nokukaleka po neameno lovanafikola.

“Ohandi halele ovanafikola novahongifikola omukumo opo va tameke nondjungu moilonga yavo yofikola,” Nghipondoka ta ti.