Kansela woshikandjohoololo shaKatyali Joseph Mupetami ota ti ovakalimo vomimukunda Okadhiya, Uulungu Wakolondo oko haku kudeulilwa ovakwaita vetanga leameno, osho yo ovanafalama vomomudingonoko wombuwa ova mona etenda lomakwatafano paife. 

Etenda eli ola tulwa po kehangano loku yandjaneka omakwatafano moshilongo loMTC, konima eshi kansela Mupetami a lila  ehangano eli lomakwatafano opo li tale ko konhele oyo yokombuwa.

Kansela Mupetami oye umwe a shivika nawa konooli ha longo noudinini nohakwafele oshiwana mo shi li. Okwa didilikwa Mupetami oha kala nokuyandja omayakulo mawa kovakalimo vomoshikandjohoololo shaye, naashi oshe mupa omito opo a kale kansela waKatyali oule weedula 23 shaashi ovanhu ova panda oilonga yaye eshi iwa. Vahapu ohave mu fana tava ti Omupiya gwoshigwana shaashi va ti okuna olukeno noshiwana.

Meenghundafana a ninga naKundana Mupetami okwa hokolola ta ti okwa li a ninga eudaneko koshiwana sho pomudinoko opo kutya otava pewa etenda lomakwatafano neudo, onghee okwa kala nokuyandje enyenyeto lovakwashiwana kuMTC fiyo kepa tau tutu. 

Onghee okwa ti ombelewa yaye oi na oshisho noshiwana notai kwashipaleke kutya ovanhu veli momhumbwe ova pewa omayakulo ngaashi naana shi li oshinakuwanifa shaye onga kansela talele oshiwana.

Kansela okwa ti ovanhu pomudingonoko opo ova kale veli moupyakadi womakwatafano unene tuu ovanahambo hava pange kombuwa ova kala tava longo noudjuu ngeenge tashi ya pomakwatafano, onghee okwa ti paife ovanhu otava kala tava dulu okulongifa eengodi davo dopeke efimbo keshe, vo otava dulu okukala tava dengele opolifi ile otuwa yoshipangelo ngeenge ve li moudjuu shaashi paife opena omakwatafano eli nawa.

“Moshikandjohoololo shange ka muna omunhu e na omhumbwe yoikulya, shaashi ombelewa yange ohai yandje oikulya komaumbo aa eli momhumbwe yoikulya,” Mupetami ta ti.

Okwa ti oshiwana nashi kwatafane nombelewa yaye ngeenge shi li moupyakadi washa, yee ta yelifa ta ti ombelewa yaye oyo shiwana onghee keshe omunhu okwa manguluka oku kala a pula ekwafo kuye.

Mupetami okwa ti okuna oku twikila nokukwafela oshiwana shaye, nokukala ta kongo omakwafo kovanhu kohadimwe opo oshiwana shaye eshi shi li momhumbwe shi kale sha mona omakwafo.