New Era Newspaper

New Era Epaper
Icon Collap
...
Home / Ovakainhu vahapu paife navo otava longo oikoya ikukutu

Ovakainhu vahapu paife navo otava longo oikoya ikukutu

2022-07-22  Festus Hamalwa

Ovakainhu vahapu paife navo otava longo oikoya ikukutu

Okwa didilikwa omuvalu wovakainhu tava kufa ombinga moimbuluma ya ‘nyika oshilumenhu’ tau kulu efiku keshe. 

Ovakainhu paife navo ove li meengudu dovalumenhu ovo tava ningi omunyeka kwa homatiwa vo tava tula ovanhu mokatoo nokukwata po ovanhu ombabyona.

Opolifi oya hokolola tai ti ovakainhu vahapu ove lininga ookakala tava longifwa kovalumenhu mokulongela kumwe moinima youmbudi.

Vati ovakainhu ohava tumwa opo va popye nomunhu tete shaashi vo vati ohave linekelwa diva nokonima ngeenge kalyamupombo womulumenhu ote uya ndele tava nyeke ko omaliko omunhu oo.

Omulumenhun weedula 25 okwa nyekwa ongodi yaye yopeke eshi a ponokelwa komukainhu noshoyo komulumenhu efimbo loufiku Etitatu molukanda laGoreagab moWindhoek. Omupopiliko wopolifi moshitukulwa shaKhomas Warrant Silas Shipandeni okwa hokolola ta ti omufekelwa oo kwa li e li nomukainhu okwa kufa ondjebo ndele ta ningile nakuninga oshihakanwa omatilifo.

Vati manga nakuninga oshihakanwa a ulikwa nondjebo moshipala omukainhu oo okwa ya meendjato daye ndele ta kufa mo ongodi noshimaliwa sha li meendjato.

Kape na omufekelwa a kwatwa po shaashi ova faduka po va uka momilaulu.

Shipandeni okwa ti unene tuu moshilandopangelo osho shimwe shi na ovakainhu hava kala tava longele kumwe novalumenhu opo va kengelela oshiwana.

Okwa ti ovakainhu vamwe ohava kala ve li meetuwa deelefa va fa ovatwaalelwa ashike konima ngeenge omunhu okwa londo mo ohe ke lihanga ashike eshi ta nyekwa omaliko aye. Okwa weda po ta ti ovakainhu vamwe ove hole okukala komalungula opo va kale tava tumine ovanhu omatulwaka kutya otava landifa oinima i na ombilixa.

Omukainhu umwe pamwe novafekelwa vatatu vovapolifi voipupulu ova kwata po omukulupe weedula 60 nomunailonga waye ombabyona meumbo laye ndele tava ka fiwa molukanda kovapolifi voipupulu. 

Oshiningwa eshi osha ningwa Omaandaxa efimbo lokomatango momukunda Ohambungu moshitukulwa shaNgwediva.

Omupopiliko wopolifi mOshana Inspector Thomas Aiyambo okwa hokolola ta ti omukulupe ou a li omuhongifikola opo a pendjelwa okwa hangika meumbo nomunailonga waye womukainhu. 

 Okudja opo vati omufekelwa umwe okwa ulikila omukulupe okakalata kaye koipupulu kutya vo ovapolifi.

Omukainhu weedula 19 e li meteelelo leemwedi hetatu okwa tulwa mokatoo komukainhu mukwao eshi e mu pula okakalata kaye kombaanga opo vati ku tuminwe oshimaliwa shaye N$6 000.

Oshiningwanima eshi okwa li sha ningwa koshipangelo shaNandjokwe moshitukulwa shaShikoto pefimbo omukainhu kwa li e uya okupulumuna.

Vati nakuninga oshihakanwa okwa kwatwa po ombabyona komukainhu mukwao ndele tava ningi omafiku ta kongwa kovakwapata vaye nopolifi.

Omukainhu oo okwa ka hangika keumbo lomufekelwa konima eshi oshiwana sha lopotela opolifi.

Opolifi oya ti modooopa yaShakati omwa didilikwa yoo mu na omukainhu ha kala a djala nawa a fa omunhu tai koilonga ashike mboli vati oha ka tula ovanhu mokatoo eshi ha kala ta kengelele ovanhu oshimaliwa neengodi davo dopeke.

Oshiwana otashi kunghililwa opo shiha yandje eenomola davo deembaanga ile oinima yavo yopaumwene kovakainhu shaashi paife ovakainhu navo ove lininga eembudi.

Opolifi oya kunghilila oshiwana opo shi kale sha kotoka ngeenge sha hangika kovakainhu vehe va shi shaashi ovanhu paife ove lininga ookalyamupombo vokutula ovanhu mokatoo.

– fhamalwa@nepc.com.na


2022-07-22  Festus Hamalwa

Share on social media