New Era Newspaper

New Era Epaper
Icon Collap
...
Home / Ovali ve na oku lya omukulukadi nokaana kange

Ovali ve na oku lya omukulukadi nokaana kange

2022-09-21  Festus Hamalwa

Ovali ve na oku lya omukulukadi nokaana kange

Omulumenhu weedula 35 okwali a fininikwa opo a yambidide omukuluhadi waye a monene okaana meumbo konima yominute donhumba eshi a taatawa koshipangelo mokati koufiku shaashi vati ita fetwa shili, oteli ningifa. 

Oshiningwanima eshi osha ningwa pexulilo lomwedi wadja ko kOmuthiya. 

Johannes Pombili lombwela Kundana ta ti omukainhu waye okwa ya koshipangelo shapangelo shaMuthiya e na oshifeta ashike vati, okwa lombwelwa kovapangi kutya nava shune keumbo shaashi omukainhu waye ote li ningifa, ita fetwa shi li.

“Okudja opo otwa shuna keumbo nomukulukadi wange. Eshi tu li mondjila yo kuya keumbo omukulukadi wange natango okwa kala e na oshifeta ashike inatu shuna ko koshipangelo,” ta hokolola.

Okwa ti meumbo ova kale mo ashike ominute 30 yee omukulukadi okwa ota mono okaana. “Onda ninga onghendabala opo ndi mu yambidide okupulumuna. Onda kala ndina oumbada kutya pamwe okaana ketu ota ka fi shaashi ka ndina ounongo wokupaunamiti,” ta ti. Ta ti omukulukadi waye okwa mona okaaana kokadona.

“Konima eshi a mona okaana onda dengela koshipangelo opo ovapangi ve uye oku yandja omayakulo opaunamiti ashike ova kwatwa efimbo lile okufika keumbo letu,” ta hokolola.

Omukulukadi wange okwa kala e li mombete, novapangi ove ke uya pa pita efimbo –Johannes ta ti.

Okwa ti okwa pandula eshi okaana nomukulukadi waye va xupa, ashike ovapangi ovali va tula eemwenyo adishe mbali moshiponga.

“Ohandi vele ombedi ovapangi shaashi ova ninga epuko eshi va shunifa ko omukulukadi wange keumbo. Ovapangi ka kwa li ve na okulombwela omukulukadi wange kutya ita fetwa shi li.” “Ngeno ka nda li po ngeno omukulukadi wange okwa mona oixuna eshi ta pulumuna,” ta ti. Okwa nyenyeta ta ti ovapangi vamwe ihava ya kula nawa ovanhu koipangelo onghee okwa kunghilila ovakulunhu voipangelo opo va kale tava ninge omakonakono kombinga nghee ovapangi neendokotola tava ya kula ovanhu koipangelo.

Eshi a kwatafana naKundana omukulunhuwiliki wouhaku moshikutulwa shaShikoto Josua Nghipangelwa okwa indila omulumenhu oo pamwe nomukulukadi waye opo va kwatafane nombelewa nomukulunhu woshipangelo shaMuthiya opo ku ningwe omakonakono kombinga yoshikumungu eshi.

Omukulunhuwiliki mouministeli wouhaku nonghalo nawa Ben Nangombe okwa ti ombelewa yaye itai popile oshikumungu eshi onghee okwa ti ota ku ka ningwa omakonakono omoule.

“Ovapangi nava kale tava ya kula nawa oshiwana koipangelo. Osha puka nai okushunifa ko omunhu keumbo e uya koshipangelo ndele ina pewa eyakulo la sha,” Nangombe ta ti.

fhmalwa@nepc.com.na


2022-09-21  Festus Hamalwa

Share on social media