Omukulunhuwiliki woshipupudilo shaUnam koRundu Dr Helena Miranda okwa ti neudo ovanafikola ve dulife 41 ova efa ofikola shaashi vati tava dengwa kondjala, oluhepo noshoyo omhumbwe yoshimaliwa shokufuta ofikola.
Okwa ti unene tuu eshongo loshimaliwa shokufuta ofikola noshoyo onhele yokudja ovanafikola osho shimwe sha etifa ovanafikola va kale va dja mo mofikola shaashi kape na ou te va yambidida.
Okwa ti ovanafikola va dja mo mofikola ove li momudo wotete noshoyo momudo omutivali welihongo lavo.
Vati ovanafikola ova fiya po omalihongo avo shaashi ohava kala va lulilwa konghalo eshi ve na eendjo doshimaliwa shaUnam ina ve shi futa.
Edi Miranda okwe di popya eshi a ninga eenghundafana naKundana Etitatu, ta hokolola nghee ovanafikola vokoshipupudilo shaUnam koRundu ve na elihongo lavo la iwa moshipala komashongo a yooloka.
Okwa yelifa ta ti ovanafikola va dja mo mofikola ova va ashike ihava mono omakwafo kehangano olo hali futile ovanafikola ve li koipupudilo yopombada moNamibia lo-NSFAF
“Ovanafikola vamwe ove tu shivifila kutya ovakulunhu wavo kave na sha onghee ngaashi osha eta opo va kale ve na omhumbwe yoshimaliwa yokufuta elihongo lavo,” Miranda ta ti.
Okwa weda po ta ti ovanafikola vamwe ova taalela omashongo ngaashi oku enda oshinano shile ngeenge tava i keetundi shaashi vamwe ihava kala ve na oshimaliwa shokulefa.
“Ohandi indile ovaleli vopapolitika, ovanangeshefa, omahangano opaumwene nosho tuu ou e na ehalo lokuyambidida ovanafikola ve li momhumbwe opo a kwatafane nombelewa yange,” ta ti.
Okwa ti osha fimana ngeenge ovanafikola tava yambididwa opo va dule okutwikila elihongo lavo onghee eshi otashi kelele opo vaha ye momapandaanda va ka kale tava longo oimbuluma.
“Oshilongo osha pumbwa ovanhu ve li hongela omaifano a yooloka opo va dule okuhambula po oshilongo noshoyo okuninga ovaleli voko mongula,” Miranda ta ti.
Okwa kunghilila ovanafikola opo va kale tave li hongo nelitulemo no nande va taalela omashongo opo va dule okuninga ovanashilonga voko mongula noshoyo oku ka yambidida ovakwapata vavo.