Ombelewa yakansela woshikandjohoololo shaNesi noshoyo elelo laUukolonkadhi ota tota po opolongalama yokuhongela oilya yokukala tai yambidida ovanhu ve li momhumbwe yoikulya moshikandjohoololo.
Ovakwashiwana vomoshikandjohoololo shaNesi ove li pyakadila paife nokutwala oilya noshoyo omakunde kombelewa yelelo laUukolonkadhi.
Kansela woshikandjohoololo shaNesi Festus Simon Petrus okwa lombwela Kundana ta ti oilya tai yandjwa otai ka yambidida ovakwashiwana va hangika komadjuu ombadilila ngaashi omundilo, efundja ile oshikukuta.
“Otwa didilika ovakwashiwana vahapu hava kala tava dengwa kondjala ashike mombelewa yetu yoshikandjohoololo iha mu kala muna oikulya yoshikukuta. Onghee naashi osha eta opo ndi kale nda ninga omutumba nelelo noshoyo novakwashiwana opo tu dule okuhongela oilya,” Petrus ta ti.
Okwa ti otava lalakanene yoo vali okushakeneka epengelo ondjilakati tashi pitile mokulwifa ondjala moshilongo.
Kansela okwa ti moule womafiku avail a pita ovakalimo vomoshikandjohoololo shaye ova holoka momwaalu muhapu ve uya okuyandja oilya komaanda oo e li pombelewa yoshitunda shaUukolonkadhi.
“Mopaife nghaa otu na omaanda oilya avali maahada oilya yadja moshiwana. Ohatu faneka opo tu ka lande natango omaanda okutula oilya shaashi ka tuna a pa hatu tula oilya,” Petrus ta ti.
Petrus okwa yelifa ta ti oilya otai ka pewa omunhu keshe e li moshikandjohoololo shaNesi e li momhumbwe yoikulya onghee oshiwana ina shi kala sha limbililwa kutya pamwe oikulya otai pewa ashike ovanhu vamwe. “Ita ku ka ningwa okatongo shaashi oilya oya dja moshiwana. Omunhu keshe ta kala a hala oilya na kwatafane noovene vomikunda avo opo ku kale kwa ningwa omalongekido nghee e na okupewa oilya,” Petrus ta ti. Okwa kunghilila oshiwana opo shi kale tashi yambididafana nokukala shi na ombili momidingonoko davo.
Eshi a ninga eenghundafana naKundana Elenga la kula loshikandjo Oshihau David Nandhinotya okwa pandula ombelewa ya kansele eshi ya tota po opongalama ei yokuhongela oilya opo i kale tai yambidida ovanhu ve li momhumbwe yoikulya.
“Ohatu kala tuna oshiwana tashi kwena ondjala shihe na eshi tashi li momaumbo. Ovanhu vamwe ihave li kola mo sha momapya avo onghee opolongalama ei otai ka eta elunduluko la kula kovakwashiwana,” Nandhinotya ta ti.
Okwa weda po ta ti opongalama ei otai kala tai twikile omudo keshe opo ku kwashipalekwe kutya ka pena omunhu ta kwena ondjala mOnesi.
Okwa kunghilila oikandjohoololo noshoyo omalelo opamufyuululwakalo opo a kufe ko oshihopaenewa eshi sho ku hongela oilya.
Umwe womukalimo ha di moshikandjohoololo shaNesi okwa hokololela Kundana ta ti mepya laye iha mono no sha oikolomwa ya wana naashi oha shi eta opo a kale ta dengwa kondjala noludalo laye.
“Paife otwa e telwa opongalama yoikulya ya nuninwa oku tu yambidida ngeenge tu he na oikulya,” ta ti.