Omupopiliko wopolifi moshitukulwa Erongo Inspector Ileni Shapumba ota hokolola ta ti neudo moshitukulwa Erongo omwa lopotwa ovanhu veli 21 ve likufa eemwenyo.
Okwa ti ovanhu ava ove limangeleka neengodi meenduda davo dokunangala, omanga vamwe ove limangelekela momiti.
Pefimbo a ninga eenghandafana naKundana Omaandaxa oshivike eshi, Shapumba okwa popya ta ti odoolopa yaWalvis Bay oyo imwe i na omwaalu muhapu wovanhu ve likufa eemwenyo ve li 10 okudja ketameko lomudo neudo.
Shapumba okwa ti ovalumenhu ovo vamwe tava dana onghandangala mokulikufa eemwenyo, omanga ovakainhu ovanini hava lopotwa ve likufa eemwenyo.
Okwa popya ta ti ovanhu na va kale tava kongo omwakwafo keengeleka, kovaxungimwenyo, ovafitaongalo, kovapolifi oshoyo kovakwapata vavo ngeenge veli hange veli moudjuu opo ku kelelwe onghalo yokulikufa eemwenyo.
Okwa ti okulikufa omwenyo hasho ekandulepo lomukundu, ndele eshi otashi eta po oluhepo unene ngeenge omunhu e limangeleka oye kwa li ha yambidida mepata.
Okwa hokolola ta ti okwa didilikwa ovalumenhu vamwe hava kala va fya eehoni okupopya novaxungimwenyo opo va topolafane omaupyakadi avo, shaashi vati ova tila okuyolwa koshiwana.
Okwa yelifa ta ti ovakainhu ovo unene va didilikwa hava ka konga omakwafo ngeenge veli moudjuu.
“Ohandi kunghulile ovanhu opo va kale tava ka konga omakwafo kovanhu ava ve lineekela opo va dule okutopolafana oiholekwa yavo.
Onghee eshi ota shi shunifa omwaalu vovanhu tava veli kufa eemwenyo pedu moshilongo,” Shapumba ta ti.
Okwa denga omufindo ta ti ovanhu veli meehole na va kale tava lombwela ovakwapata vavo ngeenge veli hange tava hepekwa koupyakadi wopamadilaadilo.
Shapumba okwa weda po ta ti ovanhu ava vena omhepo yokulimangeleka ina va pumbwa okukala veli kalela, yee ta ti ina va pumbwa yoo vali okukala tava longifa omalodu ile oingangamwifi.