Ngoloneya mukulu woshitukulwa shaHangwena Usko Nghaamwa okwa ti nonande ope na ovanhu vamwe ina va hafa eshi ta yambidida eefikola, ye itaka xulifa po okuyambidida okaana Okanamibia. Nghaamwa tati moshiwana omu na vamwe tave mu lundile kutya elalakano laye loku yambidida ehongo omolwaasho a hala oku lukilwa eefikola, oshima osho ta ti kashi fi shoshili.
“Ame ohandi yambidida ehongo tashi di komutima wange. Ngeno kwa li nda hala okuyambidida ehongo ngeno inandi shi ninga, onghee ita ndi teka omukumo nande ndi popilwe mouwii,” Nghaamwa ta ti.
Momudo 2021, Nghaamwa okwa li a anya okulukilwa oshipundilo shaNUST nonande a li a yandja omaano oshimaliwa shoN$100 000. Ta ti okwa li a anya a lukilwe oshiputudilo shaashi natango pali ovanhu tava ti okwa yandja oshimaliwa osho shaashi a hala a lukilwe oshiputudilo.
“Elalakano lange okuyambidida oshikondo shehongo opo eefikola di kale noikwafifo ya wana, noshoyo okushakeneka epangelo ondjilakati. Ehongo ola fimana kokaana keshe Okanamibia onghee onda hala moshilongo mu kale muna ounona va mona ehongo,” Nghaamwa ta ti.
Nghaamwa okwa yelifa ta ti ye haye ha ningi omatokolo opo a lukilwe eefikola, ashike omatokolo oha ningwa kelelowiliki lofikola. “Ame i handi pula eefikola di lukile nge. Ohandi lukilwa eefikola shaashi oshiwana sha panda oilonga yange ei handi longo moshilongo,” ta ti. Okwa ti ke na oupyakadi wokutambula ko ngeenge ta lukilwa ofikola ashike nashi kale tashi ningwa payuuki shaashi iha longifa oulingilingi. “Ka ndi hole oulingilingi shaashi ina ndi hala okukakeka edina lange. Ame iha ndi longo nda fa ovanhu vamwe hava kala tava futu oshiwana opo va hoololwe nokufindana omahoololo. Onghee ondi hole ouyuuki.
Okwa weda po ta ti ovanhu ovo va hala okulukilwa eefikola navo nava kale tava yambidida eefikola ngaashi ye shaashi omunhu oha tumbalekwa ngeenge a longa oshilonga sha fimana moshiwana.
Edi Nghaamwa okwe di popya Etitatu eshi a ninga eenghundafana naKundana pefimbo kwa li ta popi nghee eshi a lukilwa osekundofikola Omungwelume neudo. “Onde li longekida okukala nda tambula ko edina lofikola Omungwelume shaashi elukilo e li ole ya payuuki onghee ondi uvite etumba,” ta ti.
Omukulunhufikola wosekundofikola Omungwelume Goerge Nanghanda okwa koleka ta ti ouministeli wehongo owa dimina opo Usko Nghaamwa a lukilwe ofikola Omungwelume.
Nanghanda okwa ti ove li pyakidila oku ninga omalongekido oshivilo tashi ka kala ko pambelewa shelukululo losekundofikola Omungwelume neudo.
fhamalwa@nepc.com.na