Kansela woshikandjohoololo Oshikunde Lonia Kaishungu ota ti oshiwana shomokandjohoololo shaye osha lulilwa komhumbwe youpangelo wopaunamiti.

Kansela okwa hokolola ta ti oshikandjohoololo shaye osho shimwe shina omikunda dihapu, sho vali oshina omwaalu wovanhu munene hava longifa okapangelo kamwe ashike.

Meenghundafana a ninga naKundana Kaishungu okwa hokolola ta ti moshikandjohoololo shaye omuna ashike okapangelo kamwe oko haka longifwa komikunda adishe domoshikandjohoololo shaye, onghee okwa ti ovanhu ohava kala tava nyenyeta keshe efku va kalela ombelewa yaye tava kwena va hala oupangelo wopaunamiti va kale moshikandjohoololo shavo.

Kansela okwa ta ti okwa kala noku lopotela epangelo kombinga youpyakadi voupangelo
ndele kepe na eshi shaningwa po fiyo opaife.

“Oshiwana oha shi ende oshinano shile shile tashi ka konga ouhaku kokapangelo aka keli moshikandjohoololo shange. Omanga vamwe ohave li pange noinima yOshiwambo ngaashi oku longifa ominghudi, ile omifuwa dominghama shaashi okapangelo oke li kokule,” Kaishungu ta ti.

Kansela okwa ti unene tuu ovakulupe novakainhu veli momateelelo ovo vamwe ohava mono oixuna ngeenge tashi ya pouhaku shaashi ohava kala ashike veli momaumbo.

“Ngeenge oweya kokapangelo ketu komOshikunde oto hange ashike okapangelo kehadi oshiwana shangudumana sha hala oku pangwa, onghee eshi oha shi eta edundakano kokapangelo shaashi ovanhu ovahapu, omanga vamwe va hala okupangwa tete opo shune diva shaashi ohava di komikunda dokokule,” Kaishungu ta ti.

Okwa ti ovapangi navo ove li hava longo noudjuu shaashi okapangelo oha kala kehadi neenghono, ongheene eshi nasho oshi li oilonga idjuu kovapangi okukala tava hakula ovanhu vahapu mefiku limwe.

Kansela okwa weda po ta ti oshikandjohoololo shaye oshina natango omhumbwe yomeva, omo ta ti ovanhu vahapu natango oha teke meendungu ile momifima shaashi kapena sha oupomba.

“Omakwatafano nayo okuli eshongo lakula tali dana onghandangala moshikandjohoololo shetu shaashi omafimbo amwe ongodi yange ohai kala kai mo momhepo, molwoo omakwatafano. 

Onghee ngeenge oshiwana sha hala okudengelange oha shi kala shidjuu shaashi kapena sha omakwatafano eli nawa,” Kaishungu ta ti.

Okwa ti okwa pandula epangelo eshi latula po omayakulo amwe po moshikandjohoololo shaye nonande muna ngaa oshiwana tashi kwena omhumbwe youpangelo.