Oshilongo osha taalela omakwato koonkondo, ngoka taga ningilwa unene aakiintu oshowo uunona uushona.

Oshiwike sha zi ko omulumentu gumwe okwa Ii a mangwa po sho a li a ndopa okukwata omukiintu gumwe koonkondo nokufulukila mohanona, sho e yi tsu noombele sigo ya si.

Sha ikolela kiiningwanima ya holoka mehuliloshiwike oshinigwanima shoka osha holoka momukunda, Edhiyalyondjamba moshitopolwa shaShikoto.

Otaku hokololwa kutya omulumentu ngoka gwedhina Tuleingepo Naamongame Matias, omushiinda, okwa li anuwa a ponokele egumbo lyomukiintu ngoka ethimbo lyuusiku omanga e li kohi yiikolitha.

Opolisi oya ti omukiintu ngoka anuwa okwa li a lala pamwe nohanona ndjoka yoomwendhi 19 Esperanza Joao oshowo okanona kokakadhona komimvo 12. 

Otaku hokololwa kutya Matias okwa li ta kondjitha okukwata omukiintu ngoka koonkondo, ihe kakwa li e shi pondola.

Opolisi oya ti, omukiintu ngoka okwa li a matuka po, sigo okookamba, a ka konga ekwatho.

Okanona hoka komimvo 12, anuwa oka li ka zi mo mondunda kahumbata ohanona, sho kwa li eya thanga nokugwila pevi.

Otaku hokololwa kutya Matias, okwa li a yakula koJoao nokumutsa noshinima sha honga sigo asi.

Matias anuwa okwa li anuwa a matuka po sigo a kamangwa kopolisi.

Oshipotha she osha undulilwa komasiku 17 gaNovomba nuumvo.  

Sha ikwatelela komushingomwenyo gomomikunda Sonia Shilongo okwa ti, sha ikolela kontseyo ndyoka ena, aantu oyendji oya kwatwa koonkondo no taya tsikile okukwatwa koonkondo ihe natango inaya manguluka okulopota iningwanima mbyoka kopolisi.

“Omakwato koonkondo ihaga ningwa unene kaantu yoko kule, ihe ohaga ningwa kaapambele, aashinda oshowo mboka ye li mekwatathano na naku ningilwa omiyonena,” ta fatulula ngaaka.

Ta ti, okwa hala oshigwana shi uveko kutya kapena omuntu ena uuthemba okukondjitha omukiintu okuya momilalo. Ta ti ngoka teku kondjitha oteku kwata koonkondo.

“Onda hala okuhokolola kombinga yo mukiintu gumwe ngoka itaandi popi endhina lye omolwa egameno, ngoka a kala nokuningilwa mahepeko gomakwato koonkondo ku he,” ta popi ngaaka.

Omukiintu ngoka anuwa okwa li a kwatwa koonkondo ku he omimvo heyali, nonando a kala a itaala kutya osho shina okukala oshoka ka kwa li ena ontseyo kutya ota kwatwa koonkondo.

“Yina okwa li ahuluko omanga ena omimvo ooshona, no kwa li ya tekulwa ku he opamwe naamwayina yaakandhona yaali. Oshoka oye kwa Ii omukuluntu koo yakwawo, oye kwa li a tameke okulongelwa iilonga mbyoka,” ta hokolola ngaaka.

Ta ti, sho ya kala megumbo okwakala anuwa ha ithanwa a lale na he mondunda yimwe oshoka anuwa ye omukuluntu, no pethimbo ndyoka okwa li ena omimvo 14.

“Omukiintu ngoka paife ena omimvo 34, okwa ti, ka kwa li a vulu okupopya kaakwanezimo ye shoka tashi holoka megumbo lyawo, oshoka ka kwa li haya yi komafundho noka kwa li e uvite kutya osha puka,” ta popi ngaaka.

Shilongo okwa ti, omusamane ngoka anuwa okwa li a huluko moshiponga shohauto.

Ta hokolola kutya, he ngeno okwa li ena omwenyo paife, ngeno okweshilopota kopolisi oshoka opo uvite kutya nani okwa li e li momahepeko omandhigu.

Natango omukiintu gumwe okwa li a hokolele Kundana kutya okwa li a kwatwa koonkondo , ihe ka kwa li a lopota oshoka okwa li ena ohoni.

“Okwa li twanu omalovu opamwe nokuume kandje megumbo limwe. Sho nda li nda mono kutya onda loloka okwa li nda kalala. Ongula sho nda penduka, okwa li ndi li ngaashi nda valelwe,’’ ta hokolola ngaaka.

Ta ti, nonando ka kwa li eshi shoka sha holoka po, ongula mboka ya li pamwe naye okwa li ya hokolola shoka sha holoka, omolwa ohoni, ina  vula okukalopota kopolisi.

- vkaapanda@nepc.com.na