Ongudu yomhilamena yopambelewa yoPopular Democratic Movement (PDM) oya yandja okapangelo pambelewa koshiwana shaGrunau mEtitatu.

Moshipopiwa shaye Omupresidente wo-PDM McHenry Venaani okwa ta ti ongudu yaye otai lalakanene okuyandja omayakulo a fimana koshiwana ngaashi oupangelo.

“PDM ota ka tunga okapangelo kamwe keshe moshikandjahoololo moshilongo ashishe, inandi hala oshiwana shetu tashi mono oixuna shi 

li momhumbwe youpangelo,” Venaani ta ti.

Venaani okwa ti ongudu yaye oya udanekela oshiwana omudo wa dja ko pefimbo loshikonga shomahoololo ookansela kutya otai ka yandja oupangelo koshiwana. Okwa popya ta ti oshiwana oshi na okupewa omayakulo ngaashi naanaa PDM ya udanekela oshiwana.

Okapangelo oka tambulwa ko komupeduminista mouministeli wouhaku Dr Esther Muinjangue. Muinjangue okwa ti okwa pandula unene ongudu yo-PDM eshi i na oshisho noshiwana shaNamibia.

“Otwa pandula ongudu yopambelewa yo-PDM eshi ya kufa etokolo lomondjila liwa opo i tungile oshiwana okapangelo aka. Ondi udite etumba eshi nda tambula ko okapangelo aka nena, ponhele youministeli wouhaku noshiwana shaGrunau.

Muinjangue okwa ti ovaleli vopapolitika aveshe nava kufe ko oshihopaenenwa eshi, navo va kale tava yambidida oshiwana shaNamibia ngaashi naanaa o-PDM ya ninga.

Okapangelo okatungwa kongushu yoshimaliwa N$300 000. Venaani okwa ti kukeshe ou a hala okulongela kumwe nongudu yaye, a hala okuyambida oshiwana okwa tambulwa ko oku va waimina.