New Era Newspaper

New Era Epaper
Icon Collap
...
Home / Pulao yamufumahali yasutiswa

Pulao yamufumahali yasutiswa

2021-07-19  Maria Amakali

Pulao yamufumahali yasutiswa
Top of a Page

Khuta yenyinyani yaKatutura neisize kwapili taba yamuyahi watolopo yaWindoko, yanyaziwa kabubangoki bwakutaseza ni kubulaya mufumahali wahae ñohola. Inock Mazila Nalisa yali mwasitokisi nasakoni kuya kwakhuta, bakeñisa minyako yekwalilwe kwalibaka zamapantiti naha kaufela. Kacwalo muatuli yomunyinyani Leopold Hangalo naisize taba la 14 Muimunene. Viki yefelile yomuhulu walibaka zamapantiti mwanaha Namibia Raphael Hamunyela, nazibahalize kuli minyako yalitolongo mwanaha kaufela ika kwala kukala la 8 kuisa la 31 Sikulu. 

Kukwala minyako nekutisizwe kamaikuto akubata kutibela kuambalakana kwabutuku bwa Covid-19. Kacwalo mapantiti habana kulumelelwa kuya kwalikhuta. Kanako yakuina kwakhuta muzekisi wamubuso Victoria Valombola naize lipatisiso zamapokola halisika felelela kale. Naize litatimende zalipaki ni litatubo zalabalatoli halisika fumanwa kale. Bazekisi banyaza Nalisa kamulatu ulimuñwi wakubulaya, obaleha ni mulao otalima zabubangoki mwamalapa. 

Nalisa unyaziwa kuli nabulaile mufumahali wahae Petra Munikonzo Nyakwambo yanana ni lilimo zemashumi amalalu, kakumutaba tipa nikumunata kansando kwalikoshi kasamulaho akomano. Mufumahali wahae natimezi honafo, mi kezo yeo nebile teñi la 30 Yenda 2020, kwandu yabona mwakomponi yanaikahela ya Okahandja Park. Lipiho zasipokola libulela kuli Nalisa nakile abaleha, kono ukile ayo ipiha kwamapokola mwalihola zakakusasa la 2 Njimwana 2020, mi ase abile mwasitokisi kuzwa cwale, kasamulaho akuhanelwa kulifa mali akulibelela muzeko kwande, mwaponahalo yahae yapili mwakhuta.


2021-07-19  Maria Amakali

Share on social media
Bottom of a page