Festus Hamalwa

Ongeshefa yoRani Group oya yandja outemba veli 40 kouministeli woikwameni neameno lokeengamba. Outemba va yandjwa otava ka kwafela ovanhu vena oulema ngaashi ovakulupe nounona.

Moshipopiwa shaye minista woikwameni neameno lokeengamba Albert Kawana okwa tambula ko outemba nolupandu linene. Kawana okwa ti outemba ova fimana unene shaashi otava ka kwafela ovanhu veli momhumbwe youtemba ngaashi naana kwa didilikwa kuna ovanhu vahapu vena oulema tava mono oixuna.

Okwa popya ta ti ombelewa yomukulunhu wopolifi moshitukulwa shaShana otai kwashipaleke kutya otai ka yandja outemba kovanhu vena oulema moshitukulwa shaShana, onghee tava ka ninga omapekapeko opo va kale vadidilika ovanhu ava tava ka pewa outemba.

Pefimbo ta yandja outemba omukulunhu wongeshefa yoRani Group Ali Dharani okwa popya ta ti Ongeshefa yoRani otai twikile nokuyambidida ovanhu aveshe vena oulema, onghee kwa ti outemba veli 300 otava kala va fika moNamibia ketameko lomwedi tau ya.

Dharani okwa ti outemba otava ka topolelwa keembelewa dookansela, koministeli yehongo, omanga vamwe otava ka yandjwa kouministeli woukashike kookanhu opo kukwashipalekwe kutya keshe omunhu ena oulema ota kala a mona okatemba.

“Ohatu lalakanene opo omunafikola keshe ena oulema a kale ena okatemba kaye mwene opo adule okukala a ya keetundi ngaashi ovanafikola vakwao,” Dharani ta ti.

Dharani okwa pandula oumisteli weameno eshi tau kwashipaleke kutya ovanhu oveli weameno la wana efimbo keshe.