Omina yoRossing Uranium oya yandja oilongifo yopaunamiti komandiki ouhauku nokoipangelo aishe yomoshitukulwa Erongo.
Oilongifo ei ya yandjwa oyo omashina oku fudifa, eembete domoipangelo, oumaska, omanyala, oipundi, eefewa dokuwapaleka neefewa dokeenyala, oushina vokukonakona oupyu, noutemba vokutula ovanhu ve na oulema. Oilongifo asihe kumwe ei ya yandjwa oili pongushu yomiliyona imwe.
Ngoloneya woshitukulwa Erongo Neville Andre okwa tambula ko oilongifo ei nolupandu linene. Andre okwa ta ti okwa pandula omina yoRossing Uranium eshi ya yambidida omandiki ouhaku moshitukulwa.
“Ngaashi naana tu shishi kutya oipangelo yomoshitukulwa shetu oya kala i li momhumbwe yoikwafifo yoCovid-19 ina i wana, omo mwa didilikwa ovanailonga vouhaku va kala tava longo oudjuu shaashi kape na oilongifo yawana. Onghee nena ofye ovanelao eshi twa pewa oilongo ihapu komina yetu yoRossing Uranium,” Andre ta ti.
Ngoloneya okwa denga omufindo ta ti oilongifo ei otai ka kwafela omandiki ohauku omoshitukulwa shaye, onghee okwa ti mopaife ovanailonga vouhaku otava ka longa noupu shaashi oikwafifo opo i li ya wana, nokukwashipaleka kutya ovanailonga ova amenwa moipangelo nokomandiki.
Andre okwa kunghulila oshiwana opo shi twikile noku katunhilwa shaashi omukifi ou owa nyika oshiponga neenghono, yee ta ti ngeenge omunhu okwa tunhilwa nena oha kala e na omito ishona yoku kwatwa kombuto ei.
“Natu twikile okukala atu liufa komilandu doCovid-19 efimbo keshe opo ashike tu dule okulwifa omukifi ou,” Andre ta ti.
Omukulunhu womina yoRossing Uranium Johan Coetzee okwa popya ta ti omina yoRossing otai lalakanene oku kwafa oshiwana eshi shi li momhumbwe oshoyo oikondo aishe yomoshitukulwa Erongo.
Coetzee okwa ti omina yoRossing otai twikile nokukala tai sha kaneke epangelo ondjilakati tashi pitile mokuyambidida oshikondo shouhaku moshitukulwa.