Denis Manuel
Eyi kuna kara yidona unene omu yina kuhoroka konyima zonomvhura 30 twagawana emanguruko lyosirongo, simpe kuna kugwanekera nomaudigu aga unene udigu ou womodoropa zaRundu, kupitira mondango zodoropa omu vana kugendesa ngesi. Ame kapi nakupa umbondo vatungimo womodoropa zaRundu, eyi kuna kuhorokera morwa egendeso lyedona lina kara menomberewa dondango zodoropa zaRundu. Unene eyi nopira kupura asi ngapi vakara nomakongo gokuhura opo kwaNam Water ako kuna karako mukuro ogu agu pupu mema nkenye mvhura nkenye siruwo. Kapi yna kara asi vantu vahepa kufuta makongo gawo kondango zodoropa, nye kuna kara asi ngapi muna kugendesa doropa. Kuna kumoneka asi yininke kapi yina wapa modoropa zaRundu. Kugusako tupu mema asi vagapate, nye simpe kuna karako nonzira edi dina pilire kuwapa modoropa zetu zaRundu.
Kuna kumoneka asi doropa zetu kuna kuzigendesa vantu vana pilire kukara noudivi ntani vantu womukaro gomudona kapi ava mono vantu asi nawo mulyo. Mazuva gatatu aga, kapi kuna kara mema modoropa –ntani vatungimo kwazire mononzira valyatere, omu vahundilire nguuru asi kahepa kulihameseramo mokugusapo udigu ou nondango zodoropa. Vantu womoRundu vana pumbwa kuvapopera; vana pumbwa muntu ogu ana kupurakena komaudigu gawo, morwa yininke eyi yina gusa siruwo sosire unene. Ame kuna kuyidiworoka asi apa nguuru gomukunda gahuyungisire vatungimo kwatente asi situmbukira sendi simwe mosiruwo oso ana kara momberewa, kuna kara mokutulisapo mavango goyikunino momukunda, ntani kugava yirugana kovadinkantu. Ame ngomudinkantu gomomukunda ogu, kapi ani yihafere nsene tani mono vadinkantu kuna kugendagura tupu mononzira vahana kugara negano nkenye omu navaparuka morwa vana kara kegendeso kapi vana kara nomagano nkenye gokuvatera vadinkantu omu navavapako nompito doyirugana. Mberewa zanguuru gomukunda Kavango kuzipa yimaliwa eyi vatumbwidira vadinkantu womomukunda ogo.
Epuro kuna kara nye ngesi, simaliwa oso vayerekera kovadinkantu kapi nawa nawa asi sikisampo sitambo saso ndi? Kapi yina kara asi yinzi yina kuhorokamo momukunda kuhamena yiviyauka yovadinkantu unene momukunda gwetu.