New Era Newspaper

New Era Epaper
Icon Collap
...
Home / Shangula a pula omahangano omapako eli ufe komilandu doCovid-19

Shangula a pula omahangano omapako eli ufe komilandu doCovid-19

2021-08-11  Festus Hamalwa

Shangula a pula omahangano omapako eli ufe komilandu doCovid-19

Oininsta youhaku nonghalonawa Dr Kalumbi Shangula okwa kunghulile omahangano ena oku ninga omafudiko moshilongo opo a kale ta eli ufa komilandu edi da tulwa po doCovid-19.

Meenghundafana a ninga naKundana Shangula okwa hokolola ta ti omahangano oku ninga omafudiko naa kale taa longele kumwe nepangelo, nosho yo novakwapata voonakufya opo a kwashipaleke kutya ta eli li ufa komilandu dilile po okukelela etandavelo lombuto yoCovid-19.

Shangula okwa ti ngeenge omunhu okwa fya koCovid-19, hano pefimbo lomudimba tau etwa keumbo ina u pumbwa okukala wa dja mo motuwa, noshiwana na shi kale shi li kokule nombila pefimbo ovanhu ove li komaendo. Onghee omahangano omafudiko naa kale a wanifa po omilandu efimbo keshe ngeenge tava ka ninga omafudiko ovanhu ava va fya koCovid-19.

Okwa denga omufindo ta ti na shikale oshinakuwanifa shomahangano omafudiko novakwapata opo a kale ta kelele engudumano lovanhu vahapu komapako shaashi natango omukifi woCovid-19 omo uli moshilongo no uli wa nyika oshiponga neenghono.

Okwa ti ovanhu na vaxulife po okukala tava i komapako veli momwaalu munene shaashi eshi natango ota shi eta etandavelo lombuto yoCovid-19, onghee minista ota ti ovanhu nava kale tava kapopifa ovakwapata ashike komaumbo ndele a kuya komaendo vakangudumane.

“Omahangano oku ninga omapako na kwashipeleke kutya oku na oikwafifo yelixwa po pefimbo tava ningi omafudiko unene tuu omapako ovanhu ava va fya kombuto yoCovid-19,” Shangula ta ti.

Shangula okwa ti oshiwana na shi twikile nokuya kotunhila yoCovid-19 shaashi osha fimana ngeenge omuna atunhilwa opo a kale eli amena kombuto.

Okwa yelifa ta ti ouministeli wouhaku onghee ngaa tali twikile nokulonga noudinini nokukwashipaleke kutya etandavelo lombuto yoCovid-19 ola shuna pedu ngaashi naana omwaalu wovanhu tava kwatwa kombuto yoCovid-19 tau enda tau shuna pedu paife, yee ta ti nomafyo ovanhu tava fi kombuto ei okwa shuna pedu mopaife.

“Ngeenge oha tu li ufa komilandu doCovid-19 nena omwaalu wovanhu tava kwatwa kombuto otau shuna pedu, onghee oshiwana natu twikile no ku li ufa komilandu fye tu dule okulwifa ombuto ei,” Shangula ta ti.


2021-08-11  Festus Hamalwa

Share on social media