Aakalimo yomomundhingoloko gwaShakati Ongwediva nOndangwa oya taalela uupyakandhi moondolopa dhawo omolwa aafuthi ta yeya yugu iinima yawo. Otaku hokololwa aafuthi mboka ya toto oongundu, yeli ooya hetatu omanga yamwe yeli oomulongo. Ta kuti, oongundu yimwe oya iluku edhina “Dheng’Odomu”.
Omukiintu gumwe gwomolukunda Uupundi okwa ti, oonkalomwenyo dhawo odhili moshiponga, inaya manguluka we oku enda molukanda lwawo.
“Ondali tandi zimbuka okuza kiilonga lwopotundi 08h00 yuusiku, sho kwali nda ponekelwa kaantu yathika komulongo anuwa ndi gandje iinima ayihe ndina,” ta hokolola ngaaka.
Ta ti, ka kwali eshi mpoka eli oshoka okwali a thigwa a thangagulwa, nokwali a ningi omunelago oshoka gumwe okwali a kutha ombele ihe inemu tsa we.
Oongundu ndhoka otadhi hokololwa dhili momalukanda agehe, unene mOshakati.
Taku ti, ngele okwa ludha aalumentu mboka oya tameke okupatolola, taya yugu aantu iinima yawo. Sam Natangwe okwa ti, okwali a ponokelwa omanga ali alondo mohauto ye, poservise yopUupindi mOshakati.
“Mohauto okwali nda mono tu udhamo nonando okwali nda enda ongame andike. Okwali nduulikwa oombele kaantu yatatu, anuwa nandi gandje iimaliwa nongondhi oshowo ooshapi dhandje dho hauto,” ta hokolola.
Ta ti, okwali ayi kohi yomutumba gohauto, ta fundju ta ti, oko aholeka iimaliwa.“Ondali nda kuthako ondjembo yandje, ayehe yali ya tondokapo,” ta hokolola ngaaka.
Ta gwedha po ta ti, ka kwali ena ehalo lyokumonitha omuntu oshiponga, ihe oshali oshipukuye okushininga esiku ndyoka.
“Aantu mboka naya kale ye shi kutya aantu oyiivule, kehe shimwe otashi vulu okuningwa, ngele osho taya kongo miishana. Ha kehe gumwe a thigipo uuyuni mbuka osho a hala ,” ta popi ngaaka.
Omupopiliko gwopolisi moshitopolwa shaShana Thomas Aiyambo okwa ti, oyali ya lopotelwa kutya omuna aafuthi taya longele oshigwana omiyonena.
“Otatu kumagidha oshigwana shi kale sha kotokela aafuthi mboka oshowo shi iyande oku enda pomahala ganika oshiponga. Kehe gumwe na kale e na onomola yopolisi opo kehe ngoka taka mona omainyengo inaaga wapa, a lopotele opolisi meendelelo,” ta kumagidha ngaaka. Ta ti, opolisi mOshana oya ilongekidha okulwitha iimbuluma ethimbo alihe.
– vkaapanda@nepc.com.na