Kansela woshikandjohoololo shaKongo Efraim Shipindo mokukondjifa ondjala moshitukulwa shaye, okwa yambidida ovakainhu veli 10 noushako woufila nomaadi wokuninga oukuki.
Ovakainhu ava va pewa omakwafo ohava landifa oukuki, noumboloto modoolopa yaKongo nopeefikola noupangelo momudingonoko waKongo.
Okwa didilikwa okangudu kovakainhu ava va kala vena omhumbwe yoikwafifo opo va dule okukala tava landifa oukuki noumboloto, omanga vamwe okwa kala vaxulifa po oilonga yavo yokulandifa shaashi okwa li veli momhumbwe yoshimaliwa shokulanda oikwafifo yongeshefa yavo.
Pefimbo ta yandje omakwafo kovakainhu, Shipindo okwa ti ombelewa yaye oina oshisho noshiwana eshi shi li momhumbwe, onghee okwa ti otai kwashipaleke okulwifa ondjala noluhepo.
Shipindo okwa popya ta ti ombelewa yaye otai ka kwafela ovakainhu aveshe vomoshikandjohoololo shaye vena ehalo lokukala tava landifa oikulya ngaashi oukuki, oumboloto nosho tuu oilandifomwa yawedwapo.
“Ngaashi naana kwa li nda udanekela oshiwana shomoshikandjohoololo shaKongo kutya ombelewa yange otai lalakanene oku yandja omakwafo kovanhu aveshe tava mono oixuna ile okukwafela ovanangeshefa va shona va hala okuxumifa eengeshefa davo komesho,” Shipindo ta ti.
Okwa denga omufindo kutya oshiwana na shi kale tashi kwatafana nombelewa ngeenge shapumbwa omakwafo, opo ombelewa yaye ikale ya ninga omalongekido nghee oshiwana tashi ka kwafelwa.
Okwa okwa weda po ta ti ombelewa yaye oyelipyakidila nokutalela po omikunda domoshikandjohoololo shaye opo ikale yadidilika omashongo ataalelwa koshiwana.
Okwa denga omufindo ta ti oshiwana na shi kale shina elineekelo movaleli vavo nokukala shamanguluka oku yandja omayele nghee omaupyakadi omoshikandjohoololo ena oku kandulwa po.
“Ovakainhu na va kale tava nyangadala ngaashi okulandifa eedjove, omaxuku, oimbale noshu tuu oinima ihapu yoshiwambo. Onghee eshi otashi kwafela ovakainhu opo va kale tave lilongele oshimaliwa shavo ponhele yokukala ashike vateelela oku pewa kovalumenhu vavo,” Shipindo ta ti.