Omunongononi nomuleshi gwonkalo yombepo moshilongo Odilo Kgobetsi okwa ti omvula otayi ka loka nawa momasiku twa taalela miitopolwa yokonooli.
Kgobetsi ta ti, okuza mEtitano omvula okwa tegelelwa yi ga tilehi.
“Onkalo otayi ende tayi lunduluka yu uka kuuhwepo, oshowo kuuwanawa lela, ndyoka tayi gandja omukumo gomata” ta ti ngaaka.
Ta ti, iitopolwa yilwe moshilongo nayo oya tengenekwa tayi ka mona omata, nonando ya kala inaayi lokwa omasiku ga piti. “Onda lopotelwa natango omata omashona miitopolwa yilwe monooli,” ta popi ngaaka.
Ta kwashilipaleke kutya omvula oyi na okuloka natango, onkene aanafalama naya kale ye na omukumo.
“Omukunda ngaashi Ombuumbu moshitopolwa shaMusati, ogwa mona omata gomvula nonando hago ngaa ngoka taga hokitha. Omukunda Onghwiyu moshitopolwa shaHangwena ogwa mono omata gomvula oomilimita 40, oshiwike sha zi ko,” ta fatulula ngaaka.
Ta ti, omata natango oga dhenge ngaa kiitopolwa yilwe kuununginino woshilongo. Kgobetsi ta gwedha po kutya okutameka oshiwike tashiya, shiyenga okuna okuga dhenga pevi lela.
Nonando omvula ya tegelelwa okuza moshiwike tashiya, aanafalama yamwe otaya nyenyeta kutya iilya ya wo otayi si po komutenya.
Selma Daniel okwa ti, okwa li a pulula epya lye momasiku 16 gaFebuluali.
“Nkene iilya yandje ya piti mo mevi, Malitsa aguhe nguka omvula inayi loka,” ta popi neyeme.
Ta ti, shoka otashi ya tula muupyakadhi wo kupulula natango oshikando oshitiyali, sho oshimaliwa osho ngaa shoka tashi nyangwanyangwa.
“Onda teka nale omukumo. Otandi tegelele ngaa pamwe omvula tayi keya yo yi yumudhe po iilya yandje,” ta ti ngaaka.
Kansela goshikandjohogololo shaTamanzi Johannes Iiyambo okwa ti, aanafalama yo mo mapya moshikandjohololo she, otaya li li iilya yawo ya sa po ko mutenya.
“Omvula oya ningi ethimbo inaayi loka momikunda ndhimwe, onkene oyendji oya kanitha iilya yawo sho ya si po ko mutenya. Otashi yematake,”ta popi ngaaka.
Ta ti, shoka okwa li sha sho lolitha aanafalama yamwe mboka kaaya pulule omapya gawo omanga kwa li yena elalakano lyokupulula kehulilo lyaFebuluali.
Sirka Malakia gwomokunda Onanyalala okwa ti, okwa hepitha iimaliwa, ombundo oshowo ethimbo lye, ihe ina likola mo sha.
“Iilya yandje oya sa po thiluthilu, kandina nkene ndina okuninga, otandi tegelele ashike okukwata openzela opo ndi pululithe epya lyandje oshoka otandi ka sa ondjala,” ta po pi ngaaka
– vkaapanda@nepc.com.na