New Era Newspaper

New Era Epaper
Icon Collap
...
Home / Sikolo sa kwala bakeñisa kutokwa mezi

Sikolo sa kwala bakeñisa kutokwa mezi

2021-02-15  Aron Mushaukwa

Sikolo sa kwala bakeñisa kutokwa mezi

KATIMA MULILO – Kamaiso ya sikolo sa Impalia mwa sikiliti sa Zambezi nekwalile sikolo ni kukutisa baituti kwahae Lamubulo viki yefelile, bakeñisa kutokwa mezi.

Maticele ni bona neba yokozi kwasikolo ni kuliba kwa tolopo ya Katima Mulilo ili kobapila buñata bwa bona. 
New Era iutwisisa kuli kamaiso ya sikolo ne kwalile sikolo kasamulaho akupalelwa kuzwelapili kumangana ni butata bwa kutokwa mezi, kuzwelela likolo halikwalula kweli yefelile.

Muzaimaisi swalelele wa liluko la tuto mwa sikliti sa Zambezi Jost Kawana nanitifalize kuli sikolo nesikwalilwe bakeñisa kutokwa mezi. 
Nihaike naize nasika zibiswa keto ya kukwala sikolo, Kawana naize nalumelelana ni sikolo. “Mayemo atalusa kuli haiba hakuna mezi kitaba yesa utwisi hande kuli baituti baye kwasikolo, sihulu mwanako ya butuku bwa Covid-19,” nekubulezi Kawana. 
Kono naize butata buka tatululwa, mi nana ni sepo yakuli baituti baka kutela kwa sikolo kachenu.

Nelulekile ntambo yene uzwizwe – kintambo ye ketahani mi kanako ya cwale ifilwe mwamazoho aba liluko la misebezi.
Kintambo yebukiti mi ina ni kulongiwa mwamotikala yamufuta wa 4 x 4, ni kuyo longiwa mwa lonji kuisiwa kwa sioli sa Impali – pili Lamubulo lisika fita kale mezi akabe akwaluzwi,” nekusepisize Kawana. 

Kutokwa mezi hakushupi feela sikolo, kono kukataza cwalo ni sipatelanyana ni minzi yeli bukaufi ili babaka mezi kwasikolo.
“Sikolo ni sipatelanyana kaufela lufumana mezi kwa simbule silisiñwi, kacwalo kaufela luna lu mwabutata. Kono luna lu mwabutata hahulu, bakeñisa kuli luna ni baituti ni maticele. Viki yefelile neluilo pompela mezi mwamatanka amabeli. Viki ye neli kuli baliluko la makete bayo pompa mezi, kono motikala yabona nekakatezi bakeñisa mukwakwa omaswe,” nekubulezi Kawana.

Kutokwa mezi kwa Impalila kutiswa ki ntambo yesebeliswa kwa kupompa mezi yenze iuzwiwa nako kaufela. 
Muzamaisi swalelele naize sicaba nesi lumelelani kuyepa mungelo kuli ntambo ipumbekwe, kakuli nesiiwanga feela fa ñandalez. 
Kono naize kuyepa mungelo ikaswana yaba taba yetata bakeñisa mubu wa macwe ofumaneha mwa sioli sa Impalila.


2021-02-15  Aron Mushaukwa

Share on social media