New Era Newspaper

New Era Epaper
Icon Collap
...
Home / Sikunino pwankenye sure

Sikunino pwankenye sure

2021-06-17  Bernard Nyambe

Sikunino pwankenye sure

Namibia Agronomic Board (NAB) nkera kavageve yiruganeso yomosikunino kosure zaAus Primere yina kara asi simwe selikwamo lyawo omu vana kugava mbatero konosure kupitira melikwamo asi nkenye sure zikare nosikunino sazo. 

Elikwamo eli lyonondima eli vana tura asi talikakarako monomukunda horowero nadinye 14 domosirongo, awo kuna kara noyimaliwa yokusika ko N$1.1 yonomiliyuna. 

Projeka ezi kuna karerepo unene mokuwapukurura una ndima mokatji kovadinkantu vetu. 

Apa kahuyungire pokugava uhwi ou, ministera gerongo Anna Ngipondoka katente asi; nzodi zoministeli kuna kara asi nkenye sure zahepa kukara nosikunino. 

Age simpe katente asi vanona vahepa kuvaronga asi ngapi ava zangura mosikunino.

“Vanona vahepa kugwana udivi nomagano vatware nye monkarapamwe yimo ana kuhundira ngoso Nghipondoka. 

NAB awo vana kara noyimaliwa mokugava kwankenye sure zikare zosinauhako, omu nye vana kuturapo mema mokukwama ngendeseso zawo ezi zakarapo mokutura nondama davene yipo asi mema gagenderere kuwiza ntani apa nye ngava patesa sure nayinye oyo yina pu.

Mukurona gendesi gwaGronomy ntani etjingiso nondima koruha rwa NAB Gilbert Mulonda katente nokufaturura asi ngapi omu vana kuhorowora nosure dina kugwanenamo mauwa edi dakara novanona woruhepo, nosure dakara nare noyikunino ntani memapo vatambesera kokutekeresako. 

“Ose ngatutwikira kukeverera nosure edi dina kugwanenamo mauwa kupitira melikwamo eli ntani kugusako nye oyo, NAB ogu ana kara asi musikisimo veta zaAgronomic ntani una ndima kuna kutanta asi nosure nadinye 14 vahepa kuditjanga asi nosure dina kuzangura,’’ yimo ana kutanta Mulonda. 

Age simpe katente asi nosure 11 ngesi dina pu, ano edi mbali kuna kugendera po 90% dokukwamako ngesi kuna kudindindira ditameke. 

Mukwatelimo posure ,Mutanamiye – Nchindo, katente asi sitambo sosinene sokutura pwankenye sure sikunino sokupopera vanona ava vana kara asi kapi vana kugwana nondja dina gwanene komambo. 

Sure ngesi kuna kara novanona woruhepo wokusika ko 600 ava atupe nondja nkenye ezuva mvhura nazinye, yimo ngoso ana kutanta nokuyahagesa.


2021-06-17  Bernard Nyambe

Share on social media