Musali yana latehezwi kimbututu yahae nakonyana kasamulaho akupuluha kwasipatelanyana sa Onesi mwasikiliti sa Omusati, ubulela kuli kutokwa pabalelo kwabaoki nekutisize lifu la mbututu.

 Ndapandula Paulus nabulelezi New Era kuli mbututu yahae yamusizana, nekona kupila kabe baoki nebamutelelize hato fita kwasipatela nikubabulelela kuli nasali fakaufi nikupuluha. “Hanikala kuutwa butuku bwakupuluha Lamubulo seniya kwasipatelanyana ili sesili bukaufi, kuzwa koni ina. Baoki sebayo nitatuba nikunibulelela kuli nikute niyo zamaya zamaya, kono nisike naya kwahule, mi naeza cwalo,” natolokile.

Musali walilimo zemashumi amabeli kazesilezi kiha bulelela baoki kuli mbututu nasa taha. 

“Kono muoki atokwa kuteleza, anibuza feela kapa neli lwapili kupuluha. Nabeiwa mwamuzuzu oli kwatuko mi nalobala nikuzize. Muoki nayemi hulenyana kusina za eza. Namubulelela kuli ni utwa butuku, kono hakuna zana ezize,” atalusa. Mezi kiha pazuha mi mbututu azwa, muoki hautwa mbututu inge ilila ataha amata nikuto nopa mbututu. 

“Nayemi asweli mbututu inge abiza baoki babañwi. Bapuma mukubu niku imatiseza kwamabotela bakeñekisa kuli nesa buyeli hande,” aekeza. 

Nakonyana ato talusezwa kibaoki kuli mbututu itimezi. Paulus ubulela kuli baoki neba mutaluselize kuli mezi amwanzwalo namukeni mwalingo mi kona ane atisize lifu lahae. “Hani ikutwi hande, neni tile kuto puluha, kono nikuta kusina mbututu. Nenisikaba nibutata nako yene ni itwezi,” nekuhatelezi Paulus.

Kasamulaho akunyemiswa kikezo yeo ndatahe mbututu Nathanael Amunyela naize baoki bana nikuba nibuikalabelo. 

Hana kwaeza kuzwa kwa Windoko kuliba mutulo kuli ayobona ze ezahezi. “Kambe baoki neba alabezi kabunako kambe mbututu yaka isa pila,” nabulezi. 

Hana kupilwe kuikalabela yomuhulu wasipatelanyana sa Onesi Helena Nambano, naize hasika lumelelwa kubulela ni babihi bamakande.

Muzamaisi youmuhulu mwalikolo la makete Ben Nangombe, nasika fumaneha kuli abulele sesiñwi.

Likwambuyu wamakete Kalumbi Shangula naize hakuna saziba kakuli taba haisika bihiwa kale kwaofesi yahae.