Oshitayi shoSwapo moshikandjohoololo shaNgenga osha yandja omakwafo oikulya kombelewa yakansela wavo opo i kale tai pewa ovakalimo ava veli momhumbwe yoikulya.

Oikulya ei ya yandjwa oukutu voufila neelata doilya dili 18.

Kansela waNgenga, Matheus Shikongo okwa tambula ko oikulya ei nolupandu linene. Shikongo okwa ti ombelewa yaye oya kala nokudidilika omwaalu munene wovakalimo hava di moshikandjohoololo shaye veli momhumbwe yoikulya ovo hava kala ashike teve u ya kombelewa tava kongo ekwafo loikulya.

Ta ti oSwapo oi na oshisho noshiwana, onghee oikulya oyo otai ka pewa ovanhu meendelelo omanga inai nyonauka.

“Natango otwa pumbwa omakwafo oikulya oku pa ovanhu veli moshikandjohoololo shetu shaashi ovanhu ovahapu veli momhumbwe yoikulya. Ohandi indile ovasamaria opo va yambidide omoshikandjohoololo shaNgela,” Shikongo ta ti.

Okwa ti oshiwana nashi kwatafane nombelewa yaye ngeenge sha hala oku yandja omakwafo oikulya.

Daniel Kleopas, omukwatakanifi wongudu yoSwapo moshikandjohoololo shaNgenga okwa ti otava twikile nokukwafa oshiwana eshi shi li momhumbwe, onghee ombelewa yavo otai kwashipaleke kutya kape na omunhu ta kala eli momhumbwe yoikulya.