Mathew Hailume weedula 34 ena ounongo wokulonga noimeno ota pula ekwafo moshiwana opo shi mu yambidide noshimaliwa ile oilongifo opo a dule okukala ta yandje omadeulo kovanyasha.
Meenghundafana a ninga naKundana Etitano Hailume okwa hokolola ta ti ounamapya owa fimana kovanyasha opo va kale vena ohokwe nounongo nghee vena okukala tava longo nounamapya.
Okwa yelifa ta ti okuna elalakano opo a kale a yandja omadeulo ounamapya kovanyasha aveshe koitukulwa yokonooli shaashi eshi otashi kwafele ovanyasha opo va kale tava longo oikulya yavo veene tashi pitile mokulonga moikunino.
“Ohandi pula ekwafo moshiwana opo shi yambididenge noilongifo yokukala handi longifa ngeenge handi yandje omadeulo kovanyasha opo ndi kala handi longo noupu,” Hailume ta ti.
Okwa popya ta ti omadeulo ota kala ta yandjwa oshali kovanyasha, omo tava kala tava longwa nghee oikulya hai longwa moimeno.
Hailume okwa ti okwa tameka nale okuyandja omadeulo kovanyasha vomoshikandjohoololo shaEenhana omo ovanyasha veli 10 kwali va pewa omadeulo okulonga noilmeno. “Ngeenge omunyasha okwa mane omadeulo oha pewa odjapo yaye tai u like kutya okwa mona omadeulo okulonga noimeno. Odjapo ei ohai kwafele ovanyasha opo va ka konge oilonga yavo keefalama ile koikunino yopaumwene,” Hailume ta ti.
Okwa popya ta ti ngeenge okwa kala ena oikwafifo ya wana eshi otashi mukwafele opo a kale ta yandje omadeulo kovanyasha vahapu shaashi okuna ondjodi opo keshe omunyasha a hala okulihonga oimeno a kale a pewa omadeulo.
Hailume okwa ti okwa kala ehole oshilongwa shounamapya okudja eshi kwali eli meendodo dopedu, omo kwali a tameka hai ningi oikunino yomapungu meumbo.
“Mopaife ohandi longo noimeno oule weedula hetatu naashi osha eta opo paife ndi kale handi topolafana ounongo wange novanyasha opo va kale tava longo oikulya yavo,” Hailume ta ti.
Okwa kunghulila ovanyasha opo va kale tava kunu omiti edi hadi liwa ngaashi omapaye, omakwava, omhamengo, oikapa nosho tuu.
Okwa ti kukeshe ouna ena ehalo lokumuyambidida nakwatafane naye konomolo yongodi yaye 0814145673.