Omukainhu weedula 33 Hilda Thomas ota nyenyeta ta ti kasha li pauyuuki eshi omhangu ya ekelashi oshibofa shomulumenhu waye ou ta fekelwa kutya vati oye e mu xwikila mobashu.
Thomas okwa dile komukunda Iitananga moshitukulwa shaMusati noku li a lemana konima eshi a pila mobashu.
Okwa ti vati okwa lombwelwa komhangu kutya kape na ouyelele woshili ngeenge omufekelwa oye tuu e mu xwikila monduda ile ota lundilwa.
Onghee naashi osha eta opo oshibofa eshi shi kale inashi twikila vali komesho, yee nomufekelwa a dje mo modolongo.
Oshiningwanima eshi okwa li sha ningwa moWindhoek kolukanda Ombili momudo 2016 pefimbo kwa li Thomas e na omido 27. Mobashu tuu omo omwa fila mumwainakadona waThomas ou a hangika naye va kofa pefimbo eshi obashu ya yaka omundilo.
Thomas okwa lombwela Kundana ta ti okwa kala nokuhepekwa kohonda yaye ou e li oye omufekelwa paife eshi a kala a dengwa noshoyo okutukwa.
Okwa hokolola ta ti omufekelwa okwa kala shito he mu ningile omatilifo kutya ote mu dipaa ngeenge okwe mu efa.
“Okudja opo eshi omufekelwa a lombwela nge kutya ota dipaya nge onda kala inandi manguluka ngeenge nda kofa ile handi yi koilonga,” Thomas ta ti.
Okwa ti efiku la landula ko manga va kofa mobashu namumwainakadona lwopondi 02h00 ova mona ashike eshi ve li mobashu ya yaka omundilo tau dilile koshivelo.
“Otwa temeka oku kuwa nokuifana ovashiinda ve uye va kwafele ashike kape na ou kwa li e uya okuyambidida,” ta hokolola.
Okwa hokolola ta ti konima yefimbo ovashiinda ova penduka ndele tava dengele opolifi.
“Eshi opolifi ya fika otwa twalwa koshipangelo nokonima yefimbo mumwamemekadona okwa xulifa omanga ame onda kala moshipangelo oule weemwedi nee,” ta hokolola.
Okwa weda po ta ti okwa kala moshipangelo ko-ICU efimbo lile yee nokeenghali damumwainakadona inaya ko shaashi okwa li e li monghalo ii.
Thomas okwa ti ove shi pondla okufaduka po ashike ova hangika nale va pya komalutu va ninga oipute.
Okwa hokolola ta ti konima eshi ovanhu va ninga omakonakono ova mona kutya obashu yavo oya tomekwa komunhu e shi e uya ndele ta tile omahooli poshivelo shonduda yavo fiyo obashu aishe tayi hake omundilo.
“Onda lombwela opolifi kutya omuholike wange oye e na okukala e tu xwikile mobashu shaashi okwa kala nale ta ti ota dipaya nge. Okudja opo opolifi oya kwata po omufekelwa,” ta hokolola.
Thomas okwa ti okwa kala ha i komhangu koihokolola ashike omhangu oya kala tai ti kutya kape na ouyelele woshili ngeenge omufekelwa ou oye tuu e va xwikila monduda.
“Okudja opo omufekelwa okwa lekelwa mo modolongo nokonima yoivike ivali natango okwa kwatwa po eshi oshiwana sha ninga omunyanyo wopambili tashi pula omufekelwa a kwatwe po diva,” Thomas ta ti.
Okwa ti eshi omufekelwa a kwatwa po natango okwa mangululwa shaashi vati kape na ouyelele tau ulike kutya oye a tema obashu.
“Okudja opo oshibofa osha xula po. Kandi na ombili yokomwenyo shaashi paife onda ninga oshilema. Onda kanifa ondenge yange ashike omufekelwa fiyo opapa ina mangwa po,” Thomas ta hokolola.
Okwa weda ta ti omufekelwa paife okwa hombola nokuli shaashi paife okwa manguluka eshi ha kala ta ti epangelo kali na eshi la ninga po.
Eshi Kundana a kwatafana nomupopiliko akula komhangu yopombada Victoria Hango, okwa ti ovanambelewa otava ka tala momambo kombinga yoshibofa eshi.
“Ngeenge otwa mono ouyelele momambo etu ohatu ka yandja emanyamukulo kutya omolwashike omufekelwa ina monika ondjo,” Hango ta ti. Kundana okwa ninga yoo va li onghendabala yokukwatafana nomufekelwa ashike ongodi yaye oya kala ya dima.