Elelo lyomuthigululwakalo gOukwanyama, olya koleke eso lyaTatekulu Simon Kaupa Mwatotele, mwene gomukunda Efidi Lomulunga, ngoka a li wo oye mwene gweziko Elyambala.
Mwatotele ngoka a lele Efidi Lomulunga ethimbo ele, okwa hulithile moshipangelo shaShakati, uusiku wOlyomakaya mepipi lyomimvo 90.
Omunashipundi melelo lyopamuthigululwakalo lyOukwanyama Lisias Uaandja, okwa lombwele Kundana kutya elelo lyawo olya kanitha natango elenga enene lyomukunda Onamutai Amon shipanga oshiwike sha zi ko.
Ta ti, oya kanitha oongundhi dhelelo yOukwanyama.
“Omaso ngaka gaali, oga thiga po omwaka omumene melelo lyOukwanyama. Otwa kanitha aaleli, ya lela ethimbo ele, aalongi oshowo aantu yombili. Ayihe otwe yi taamba ko,” ta ti ngaaka.
Uaandja okwati, elelo lyOkwanyama otali gandja omahekeleko kaathigwapo ayehe, yomazimo gopaali.
“Onda kundana kutya Shipanga ota fumbikwa Olyomakaya twa taalela, omanga Mwatotele, omalongekindho ge fumviko opo geli metifa,” ta popi ngaaka.
Omonakandhona gwaMwatotele Aili Nanguloshi Nghilengwa okwa ndjokonona he onga omuntu gombili, omutulikumwe gwaantu oshowo omulumentu e hole aantu. “Otwa kanitha ependa. Otwa thigwa momalimbililo kutya olye ta thigulula po onkalo ye. Omwenyo gwe nagu vulukwe nombili,” ta popi ngaaka.
Omaso ngaka oga holoka ashike konima yomasiku omashona ga piti po, sho omalenga omenene melelo lyopamuthigululwakalo gOndonga, Kashona kaMalulu gomukunda Ombulu oshowo Vilho Kamanya gomukunda Amuteya ga hulitha.
– vkaapanda@nepc.com.na