New Era Newspaper

New Era Epaper
Icon Collap
...
Home / Tifo yalinzila ikaekeza ka15%

Tifo yalinzila ikaekeza ka15%

2021-10-25  Staff Reporter

Tifo yalinzila ikaekeza ka15%

 Mubihi waMutende

 

Katengo kakayemela bakwaezi balimotikala zelonga batu (Nabta), neka zibahalize viki yefelile kuli kuekeza kwalika zelekiwa zabutokwa, hamoho cwalo nikekezo yamafula, tifo yalimotikala zetuna zelonga batu nize nyinani (taxi) ika ekeza ka15% kukala la 1 Njimwana. 

Tifo yanzila nekile ya ekezwa mwanako yakukwalwa kwanaha bakeñisa sa Covid-19, kono nekutile fafasi kulatelela kuliululwa kwamilao. Ili kutoloka kuli tifo yakukwela taxi yeli faN$12 ika ekeza kuba N$14. 

“Kikalibaka leo limotikala zelonga batu linze lisebeza fasinyehelo kanako yetelele kusina kekezo. Kacwalo, limembala zasicaba basusuezwa kuitukiseleza licinceho, ni kulatelela kaswanelo,” nekubaleha sitatimende kuzwelela kumueteleli swalelele wakatengo kaNabta Jeffrey Platt. 

Nabulezi hape mwasitatimende kuli kukaba ni mukopano wakutalima litifo zanaha kaufela la 28 Yenda. 

“Libaka tuna lakueza mukopano wabutokwa wo, kikutalima sinca nikusikulula litifo zalinzila, ili kuli kube feela ni tifo iliñwi mwanaha kaufela,” nabulezi. 

Namemile hape bakwaezi balimotikala zelonga batu ni beñi balimotikala zeo kuzwelela mwalikiliti kaufela kuya kwamukopano.

Kilimembala feela zene zakatengo kaNabta zeitekezwi kuzwa mwasikiliti ni sikiliti, bayemeli bababeli balitotikala zamisipili yemitelele, ni bababeli balimotikala zamisipili zemikuswani. 

Kisikiliti feela sa Khomas sesilumelezwi kulumela limembala zelishumi kwamukopano. 

“Limembala baelezwa kutaha ni mapampili asupeza litifo zakale mwalikiliti ni litolopo moba simuluha, ili kuli musebezi wakuto talima sinca litifo utoba bunolo,” neku ekelize Platt.


2021-10-25  Staff Reporter

Share on social media