MUZII – Bayahi basilalanda sa Muzii babilaezwa kitiyeho ya zwelopili. Hala zeñwi babilaela kitiyeho yakuwubelwa kwa sikolo sa Muzii, ili kulika kuyandulula mutunda wasikolo. Sikolo sa Muzii kisesiñwi sa likolo zefumaneha mwalibaka zetibiswa kimezi amuunda, mwasilalanda sa Kabbe ya Mbowela. “Nelusepisizwe kuli sikolo sa luna sikabidelwa ni kuyahelwa makilasi amanca. Kono kuli lika zeo liezahale hali ezahali. Halubulela ni mina selu ikalelezwi kuli mezi amuunda kikale afita ili kutoloka kuli lwakuta mwabuino bobuswana. 

Kona halukupa muuso kuli ualabele kwalitaba zeo kakuli banabasikolo banyanda, hamoho cwalo ni maticele. Kakuli mezi hataha bukaufi mutunda utobanga omunyinyani,” nekubulezi Joseph Liyungu, muinasipula wakatengo kakabona zazwelopili ya mwaminzi. Pilaelo yeñwi kiyamaino abaituti kwasikolo. Sicaba sibilaela kuli hasisika fumana tuso hala kuyahela baituti maino kwasikolo mane cwalo nikubalekela lico.

 “Sibaka saluna simaswe haluna hande miyaho ye inzi hande. Kono haluya kwamaofesi balusepisa feela kono hakuna tuso. Miyaho yaluna isiezi feela ona cwalo mone lukalezi. Nibutata bwalico. Sheleñi yebalifa banabaluna kiyenyinyani, ilunga feela likweli zetalu. Muuso haiba inge usa alabeli fateñi, bashemi baluna babelwa bukiti,” nekubulezi muinasipula wakatengo kakabona zamaino abanabasikolo

Bayahi bape babilaela hala tiyeho yakuyahiwa kwasipatelanyana. “Se seli silimo sabulalu sipatela inge siyahiwa. Kuli sifele hasifeli. Kuli sikwalulwe hasikwalulwi, haluzibi kuli kuezahalañi. Sabo yaluna kikuli manyando aluna akazwelapili, kambe balutiseza nihaike muoki ni milyani, sipatela niko sisika felelela cwalo, yakana ato alafanga batu, muuso hausa feleleza sipatela. Kakuli kwa Itomba kikwahule, babañwi kibasali, babañwi kibasupali, babañwi kiliyanga, kona halubilaela hahulu hala sipatela kuli balutuse,” nekubulezi Liyungu. 

Hana kupilwe kualabela fatiyeho yakuyaha sipatela sibuabui walikolo la makete Walters Kamaya natolokile kuli mi aho haikonwi kusebeliswa kanako yacwale bakeñisa kuli hakuna simela sei alafa mezi azemasila. “Likolo lisweli kuongaonga kuli kutoba ni patisiso fasilalanda pili simela sa kualamba mezi sisika lekiwa kale,” nekubulezi Kamaya.