Mosiruwo nye sokupira kusikisamo veta zoCovid -19 zina kara namunye Omusati ntani Ohangwena, kurandesa yikunwa mosiruwo sonovili edi vana silike simpe kuna kuhoroka komaruha gamwe, unene konomukunda gona dimwe, omu vatungimo vana kurandesa marovhu gopampo aga gadivikwa asi Tombo. Omusati, mukurona govaporosi Titus Shikongo katente asi kusikisamo veta momukunda gwendi kuna kugendapo nawa, unene modoropa. Ose kuna kupandura vatungimo modoropa keruganeno kumwe mosiruwo esi tuna kupita ngesi. Eyi kuna kuyisikisamo papa tupu vatulisapo elikwamo lyokuza monomukunda nokukona kona makura vantu nawo yipo vatameka kutjindja mukaro gwawo vasikisemo veta ezi yimo ana kutanta Shikongo. Nampili ngoso, mukurona govaporosi katente asi napa nopena tomonoko vamwe vana kupira kuyisikisamo unene wokurandesa marovhu nava vana kupitakana vili vana tulisapo zokupira kugendagurantani kuza momavango ogo vana silike posiruwo esi.
‘’ Omu tuna kumona asi kapi vana kuyisikisamo unene kuna kara ponomukunda doponze zodoropa, unene oku avarandesere tombo. Nonzira domamawiza nado kuna kara asi kuna kuretesapo iudigu morwa vasingi mahauto kuna kuruganesa nonzira odo vaze komavango aga vasilika, yimo ana kutanta Shikongo. Posiruwo nye esi asi sirongo nasinye vanasizedire ketameko tupu lyokwedi kooku, Omusati kwagwana sivaro sokusika ko 50 sovantu vana kupira kusikisamo veta. Mowoowo, Shikongo katente asi 37, kuna kara wokurandesa marovhu, vane wokuza pevengo vana silike ano vatano wokupira nye kusikisamo veta ezi tuna kara nazo ngesi, vavali wokupira kudwara Yuma kokana nokomazuru ntani wokupira nye kusikisamo veta zomapongo.
MoOhangwena, mukurona govaporosi, Elizabeth Muket-Sibolile nage kalizire nononkango odo, omu katente asi mukaro govantu monomukunda kuna kara simpe pwahana elitjindjo. Muket-Sibolile katente asi awo kuna kugwana mapukururo konompitisili dopampo omu vana kutanta asi vantu simpe kuna kusansensa noveta tuna kara nado ngesi.
Vantu simpe kuna kara neparu lyawo lyanare, apa nye natugwana nombudi dangoso, hawe osoe tatuzi kovantu owo tuka vatantere omu natukafatwilire asi yinke yokurugana ntani yinke yokupira kurugana yimo ana kutanta Muket-Sibolile. Nokuhundira vantu asi vahepa kusikisamo veta ozo yipo asi vahahanesa mukisi kovakwawo. Age simpe kahundilire vantu asi nsene tavakara pehoreko vahepa kusikisamo sivaro oso sina karapo ngesi. Nsne eparu kuna kudigopa, hawe nompo detu nado dahepa kukara asi kuna kudigopa nanayinye tuna kurugana yahepa kudigopa ntani, yimo ana kutanta ngoso Mukete-Sibolile. –nashipala@nepc.com.na