Omulumenhu weedula 31 okwa fya eshi a yashwa kopolifi omanga omukainhu umwe okwa lemanekwa konima eshi a yashwa kopolifi Etitatu efimbo lokonguloshi komukunda Onaminda uli popepi nOshikango. 

Nakufya oye Lebbeus Shikondjele Wambali.

Omupopiliko wopolifi moshitukulwa shaHangwena Inspector Kaume Itumba okwa hokolola ta ti osha li efimbo lokonguloshi eshi kwa li ovapolifi tava kendambala opo va kanghameke otuwa yokatuukala ei kwa li tai shingwa kuWambali oo ali novakainhu vavali.

Itumba okwa ti opolifi oya kala nokunghameka otuwa yavo ashike omushingi okwa kendambala opo a faduke po ta shingilile. Vati omunambelewa wopolifi umwe okwa umba ondjebo ndele tai yashe omulumenhu ou kwa li tashingi nokuxulifila ponhele opo, omanga omukainhu umwe ou kwa li naye eli motuwa omo okwa lemanekwa konima eshi a yashwa kopolifi.

Itumba okwa ti konima opolifi eshi ya handa motuwa omo omwa hangika muna oipateke ili itanho yexuxwa ditalala, oyo ta kufekelwa kutya oina okukala yandja moAngola pamwe. Omukainhu ou alemanekwa okwa twalwa koshipangelo shaNgela opo aka mone epangolopaunamiti, ou ta ku hokolowa kutya okuli monghalo idjuu shaashi okwa mona oshiponga neenghono.

Itumba okwa ti kapena omunhu a kwatwa po fiyo opaife onghee omakonakono opolifi otaa twikile.