United States di !hūǂnûǁkhaeba-aos Namibiab ǁgas Lisa Johnsons, ge ǂoa ge wekheb ai tawedeǁnāxūs sarisa !Hūb di ǁÛb Hage Geingob ǀkha !Hūb Oms tawa ge ūhâ i. “Nētsē ta ge go hā, î ta ǂgaoba xu hâ gangansa mā tsi sa ǂkhâ!nâs !aroma, tsî ǀgaisa !gaeǁares Namibiab tsî United States hâra ǁaegu ta ti hâs nēpa ta ge ǀkhīsa xu tsî ǁnās ai!âsa xu gere hō!âs ǂnamipe,” tis ge ǁ-îs saris !nâ ge mî. Johnsons ge Geingoba ge mîba, ǁ-îs ra United States ra Namibiab hîa ǀgaisase !nonaǁî !haros Covid-19 ǁkhōǁkhōsa ǁōs dis xa tsâǀkhāhe hâba mā ǂgao ǂkhâ!nâs xa. “Tita ge ti ǁkhaeǂgaosa mâ ǀguiǀguibe khoe-i hîa ge nē ǁōs xa !aromahe hâse ǀnamsabe-e a ǂoa!nâ-e ra mā ǂgao tsî ǁnān hîa ǁîn ûiga ra !khamban tsîna !hae ǂurusiba ra ǁkhoreba,’ tis ge gere mî. Johnsons ge !goaxa tsēdi !nâ nî ǁaru Washington DCsa !oa, ǁnāpas ge ǁaupexa !nona kurin tsî !khare ǁaeba Namibab !nâ !hūǂnûǁkhaebas ǀkha sîsenxa is khao!gâ. ǁÎs ge kurin nēpas ge hân tsî sîsenxasigu âs ǂnamipe gere kō-oa tsî !Hūb di ǁûba ge mîba, sîsenxasigu !Hūǂnûǁkhaebas digu nî ai!gûsa ǁîs di ǀgaisa sîsenǁare-aon ǀkha, ǀasa !hūǂnûǁkhaeba-ao-i nî hās kōse. “Tita ra ǂgomsa !oa da ge ǂguina ge sī!nâ,” ti mî tsîs ge ǂurusib ǂnamipe ge mî ǀgūǁaes ge nē !hūǂnûǁkhaebasa, Namibiaba nē !aorosa tsî ǁkhōǁkhōsa 3ǁî !haros Covid-19 dis ǂnamipe ǀgaisase a mâ!gâ tsî ǂhâbasa huib tsîna nāsa. ǁKhātis ge Covid-19 ǀguisa !gâi!gâ tama ge i xawe HIV/AIDS ǀae-aon !aromas tsîna ai!gâ ra huiba ge mā. !Auga!hūsi ǂharugub hîa gomaǁgan-i, bir-i tsî ǂnomn ai hâb ge ǀgaisa ǂkhâ!nâs US dis ǀkha ǀgapi !harosa ge sī!nâ. “Sida !aroma I ge go !gâi I sasa nēpa ūhâsa tsî ta ge ra ǂgom!gâ, sa hâs nēpas dis go ǂoaǂamsaba si I !khaisa, kaises go ǀguixasib ǀkha gere sîsensa ra ǂan!gâse. Tā ǀuru da re ǁarus karas khao!gâ. !Gomsin tsî ǂhâsigu nî hâs kara, o da ge sas ai nî ǁgâi, !hūb di mâsibas go ǂan tsî ra ǁnâu!ā amaga,” tib ge Geingoba ge !eream. Johnsons ge noxopa ge mî, ǁîs hoa ǀgam !khāǁkhaera ge hōsa. US ge nēsis kōse !nona biljun !khāǁkhaesoǀôana !hūbaib ǂhabase ge mā. “!Khāǁkhaedi ge a !norasa, ǂâuǀoa hâ sîsenǂuiba ūhâ, satsa ǀaeǁgâuba xu nî ū-oa tsî ûiba ǂoa!nâsa ǁkhaeba. Sa ǀnamsaben tsînats nî ǁkhauba,” tis ge ge mî. Geingob ge Johnsons tsî ǁîs sîsenǁare-aona kai gangansa ge mā nēpa hā sîsen ǁkhās !aroma.