Etitatu lyoshiwike shika otaku ka kala omauliko oshowo ethigathano lyuukadhona kamana wuna omaulema ga yooloka mOngwediva.
Omukokoli oshowo omuwiliki gwethigathano ndika tali ithanwa Miss Ability Namibia Pageant, Eva Josaphat okwa ti, okwa li e ya po nethigathano ndyoka tango momumvo 2018, ashike omimvo dha piti po pokati okwa li lya kalekwa omolwoCovid-19.
“Onde ya po nedhiladhilo ndika okugandja ompito yokuulika omauwanawa gaanuulema, kaaye na uumbanda washa nenge uutile washa, ” ta fatulula ngaaka. Ta ti aantu ye na uulema aawanawa, yo aantu woo ya fa aantu ayehe, onkene otaya kala ye na omukumo ngele taya pewa oompito dholudhi nduka ya ulike uunongo oshowo uuwanawa wawo.
“Otwa tegelela aakiintu ye li 15, taya kutha ombinga, okuza kuulema woshipa, eembolo oshowo kehe ngoka e na uulema wulwe,” ta ti ngaaka.
Ta fatulula kutya okukutha ombinga kaku na ondjindikila, kehe gumwe okwa manguluka okuninga omayindilo, okuza poomvula 18 sigo 45.
“Onda hala okuhiya kehe gumwe a thike esiku ndyoka opo tu yambidhidheni aakadhona oshowo oomeme taya ka kutha ombinga methigathano lyokuulika omauwanawa gawo,” ta hiya ngaaka.
Josaphat okwa kumagidha wo natango kehe ngoka e na uulema opo a thike, ya mone aakadhona aakwawo nkene ya manguluka oshowo ya iteela kutya yo aanuulema aawanawa.
“Uulema itau ti, ito vulu okuninga sha, omuntu e na uulema omuntu ashike a fa aantu aakwawo, ta vulu okulonga kehe shoka tashi longwa kaantu ayehe,” ta kumagidha ngaaka.
Ta ti, aantu mboka oya pumbwa ohole nokutsuwa omukumo opo ya kale ya manguluka, oshowo mboka taya iholeke ya manguluke wo.
Gumwe gomaakuthimbinga Liina Simon gwomOshakati okwa shanga kepandja lyethigathano ndika komalungula ta ti, uulema we itau mu imbi okukutha ombinga mwaashoka a hala.
“Onda ilongekidha okuulika uuwanawa wandje esiku ndyoka. Uulema inawu talika ko onga uupyakadhi, natse aantu ashike twa fa aantu ayehe,” ta popi ngaaka. Frieda Mandjangi ngoka naye a kutha ombinga okwa ti, okwa hala okuulikila oshigwana kutya ota vulu okulonga shoka kaakwa li ya tegelela a ninge.“Ondi na uulema shili ihe shoka itashi imbi ndi gwanithe ehalo lyandje sho lya hala,” ta popi ngaaka.
– vkapaanda@nepc.com.na