New Era Newspaper

New Era Epaper
Icon Collap
...
Home / Va dika onhanda mOnethindi tava kongo oilonga

Va dika onhanda mOnethindi tava kongo oilonga

2021-09-22  Festus Hamalwa

Va dika onhanda mOnethindi tava kongo oilonga

“Ohatu mono oixuna koluhepo, otwa pumbwa oilonga, momaumbo katu na eshi hatu lile mo shaashi kamu na oikulya. Out na ounona tava mono oixuna kondjala vehe na eshi tava li, ounona vetu vamwe ihava i vali keefikola shaashi out li moupyakadi mokufuta eefikola davo.”

Aa omatumbulo ovakainhu novalumenhu tava hokolola nghee tava mono oixuna koluhepo nondjala.

Ovanhu ve li 15 ova ninga onhanda pOnethindi ponhele yokumwefa omaaholi, omo tava ti kutya paife ova kala po oule woivike ivali nounona vavo. Pefimbo Kundana e va talela po Etivali ova popya tava ti ova hala okupewa oilonga kepangelo ile komahangano opo va kale tava mono oshimaliwa shokulikwafela nokuyambidida omaludalo avo.

Ova ti ohava dulu ashike okulonga oilonga yokeenyala ngaashi okuteleka, okuwapaleka, okulela ounona momaumbo omanga ovalumenhu ova ti otava dulu okulonga oilonga ngaashi okulifa oimuna ile okulonga oilonga yOshiwambo yomomaumbo.

Maria Salom weedula 38, e na ounona vane okwa hokolola ta ti oku na omhumbwe yoikulya, omo ta hokolola ta ti ounona vaye vamwe ova ninga omanyutu kondjala.

Salom okwa lombwela Kundana ta ti okwa hala oilonga yokuwapaleka meembelewa ile okulonga meefaalama opo a dule okukala ta mono oshimaliwa shokulanda oikulya younona vaye meumbo.

“Mopaife ounona vange ohava nu ashike omeva, meumbo kamuna sha oikulya shaashi kandi na sha oiyuuyemo opo ndi dule okuyambidida oludalo lange. Ooxe vounona vange navo ihava longo onghee eshi oshi li eshongo linene nda talela.” Salom ta ti.

Ova popya tava ti ponhele apa hava di paife kave na eshi tava lile po, ashike omafimbo amwe ohava pewa oikulya kOvasamaria ngeenge ve u ya okumwefa omaholi.

“Ame ondi na ounona veli vaheyali, ounona vange aveshe ohava xupu mwaame ashike kandi na eshi handi va pe shaashi ihandi longo. Ihandi kofa vali nawa shaashi ohandi kala handi lipula onghalo yoluhepo tai monifa nge oixuna,” Patricia David ta hokolola.

Kukeshe ou e na ehalo lokuyambidida nakwatafane navo konomola yongodi 0814833934.

David okwa ti ota indile moshiwana opo shi yambidide ounona vaye noidjalomwa noikulya shaashi ove li momhumbwe.

Ova popya tava ti ova manguluka okutameka oilonga efimbo keshe moitukulwa konooli ashike, vo tava weda po tava ti kutya otava kapandula oshiwana eshi tashi ke va yambidida.

fhamalwa@nepc.com.na


2021-09-22  Festus Hamalwa

Share on social media