Ovalumenhu vavali ova kwatwa po, omanga omufekelwa umwe okwa faduka po, eshi va hangika nomapangwe e li pongushu yeemilliona N$1.2.

Oshiningwanima eshi osha ningwa Etivali molukanda Otjomuise moWindhoek efimbo longuloshi. Omupopiliko wopolifi moshitukulwa shaKhomas Warrant Silas Shipandeni okwa hokolola ta ti omapangwe oo a dja koshilongo South Africa okwa hangika moipakete inai patululwa.

Okwa ti ovafekelwa ova kwatwa po eshi omukwashiwana umwe a lopotela opolifi eshi a mona oipakete yomapangwe tai londekwa motuwa.

Okudja opo opolifi oya ninga onghendabala yokukonga otuwa oyo ya londekwa oingangamwifi fiyo ovafekelwa tava hangika meumbo lavo.

Opolifi oya hokolola tai ti omufekelwa ou a faduka po okushiivike nawa moshiwana kutya oha landifa oingangamwifi shito mOtjomuise.

Onghee opolifi otai indile moshiwana kwau e na ouyelele kombinga yomufekelwa ou a faduka po opo oshiwana shi kale sha lopotela opolifi keshe i li popepi.

Ovafekelwa otava holoka momhangu yaKatutura Etitano nomakonakono opolifi otaa twikile.

Omufekelwa umwe oku na omido 31 omanga umwe e na omido 23, ovakalimo vomoWindhoek.

Opolifi oya kunghilila oshiwana opo shi kale alushe tashi longele kumwe nopolifi mokulopota ovanhu tava landifa oingangamwifi shaashi inai pitikilwa mo moshilongo. - fhamalwa@nepc.com.na