Ovafekelwa veli vatatu ova ponokela eumbo lomokalilepo shilongo mukulu koChina Johannes Nakaambo, ndele tava ku fa mo oshimaliwa sheemiliyona N$2. Oshiningwanima eshi osha ningwa Omandaxa efimbo longula potundi 09h00 momukunda Omangudu, momudingonoko waNankali moshitukulwa Oshikoto. Opolifi moshitukulwa shaShikoto oya koleka oshiningwanima eshi.

Oshikondo shokukonakona oimbululwa shopolifi moshitukulwa shaShikoto osha hokolola tashi ti osha li efimbo longula eshi ovalumenhu veli vatatu va ponokela meumbo lomukalelipo shilongo mukulu koChina, vati va djala oikutu yafa inya hai djalwa kovanhu hava pange ovanaudu voCovid-19 koipangelo. Pefimbo loshimbuluma sha ningwa mwene weumbo ina hangikamo meumbo.

Opolifi oya ti ovalumenhu meumbo ova hangamo ounona vavali nomunailonga weumbo womukianhu. Vati ova kufa eengodi dolusheno ndele tava patele ounona nomunailonga monduda yokunagala, ndele tava mange ovaneumbo neengodi dolusheno.

Opolifi oya ti ovalumenhu ova ya konduda ya mwene weumbo ndele tava tete okafe nokukala oimaliwa, omo va hanga muna oshimaliwa sheemiliyona N$2 nokufaduka po na sho.

Opolifi oya ti ovalumenhu ava okwa li tava shingi otuwa yokatuukala kabulau kena eenomola doipupulu. 

Opolifi oya ti kapena omufekelwa a kwatwa po fiyo opapa, onghee hano otai ndile moshiwana opo shi kwafele opolifi mokukonga ovafekelwa. Oshiwana nashikwatafane noitaashi yopolifi aishe yomoshilongo ngenege shina ouyelele.