Omulumenhu weedula 54 okwa fya eshi vati e liyasha nondjebo yamushiinda shaye. 

Oshiningwanima eshi osha ningilwa poundingosho pomukunda Okambonde moshitukulwa shaShikoto. 

Nakufya okwa tongololwa oye Leonard Kalimbo omukalimo womomukunda Okambonde. 

Omupopiliko wopolifi moshitukulwa shaShikoto Inspector Ellen Nehale okwa hokolola ta ti Kalimbo okwa pula mushiinda shaye ondjebo opo vati a ka yashe omakodi oo a haa kala taa piyaneke eexuxwa daye. 

Okudja opo vati Kalimbo ina ka yasha vali omakodi ashike okwa ya keendingosho nondjebo. 

Opolifi oya hokolola tai ti ovakwashiwana ovo va li peendingosho ova uda ashike ondjebo ya topa eshi Kalimbo e li yasha medimo nokuxulifa ponhele opo. 

Ina fiya po omukanda tau yandje ouyelele kombinga yefyo laye onghee omakonakono opolifi otaa twikile. 

Opolifi oya kumaida oovene veendjebo opo va xulife po okuyandja eendjebo davo kovanhu shaashi ope na ovanhu vamwe hava kala ve na omhepo yokulikufa omwenyo. 

Oshiningwanima shikwao, omulumenhu weedula 24 okwa fya eshi a yashwa nondjebo molukanda Otjomuise moWindhoek Etitatu lwopotundi 01h30. 

Otaku hokololwa kutya nakuninga oshihakanwa okwa li e li omutumba mepandaanda nookaume kaye nokonima okwa dja omulumenhu ou e li omufekelwa ta ti kutya ota pukululwa. Okudja opo vati omufekelwa okwa kufa mo ondjebo yaye nokuyasha nakuninga oshihakanwa loikando ivali monhulo. Opolifi oya hokolola tai ti kape na ouyelele kombinga yomufekelwa ou. 

Lopokati opo, opolifi oya hokolola tai ti omulumenhu ou kwa li a ninga omafiku moshipangelo shaMedi park konima eshi kwa li a dengwa okwa xulifa. 

Oshiningwanima eshi osha ningilwe momafiku 11 omwedi ou komukunda Ondema moshitukulwa shaMusati. Otaku hokololwa kutya nakuninga oshihakanwa okwa li a dengwa noikulumbwati komutwe komufekelwa pefimbo kwa li tava tanguna. 

Opolifi oya hokolola tai ti omutamanekwa David Nghishoono weedula 37 okwa kwatwa po eshi ta tamanekwa oshibofa shonghendabala yedipawo ashike paife ota pangulilwa oshibofa shedipao. 

fhamalwa@nepc.com.na