New Era Newspaper

New Era Epaper
Icon Collap
...
Home / Wakudumo kahundilire vatungi konomurudi vahepa kugwana vendwa tintiko

Wakudumo kahundilire vatungi konomurudi vahepa kugwana vendwa tintiko

2022-02-17  John Muyamba

Wakudumo kahundilire vatungi konomurudi vahepa kugwana vendwa tintiko

Rundu - Nguuru gomukunda Kavango zoupumezuva Bonifatius Wakudumo kahundilire vaAngola novaNamibia vafumadeke Covid-19 noveta nonongendeseso kukwama mwankenye sirongo omu vana diturapo nsene asi tokadingura pokatji koyirongo eyi yivali morwa ngesi nomurudi dina paturuka konyima tupu nomvhura mbali omu dapata. 

Nguuru kageve mbudi ezi poopo kavazigwilire nomurudi daNamibia naAngola moRundu nkera. 

‘’ Ame posiruwo esi nahepa kupandura epangero lyaAngola mokuruganena kumwe, eruganeno kumwe lyakarapo siruwo nasinye. 

Natuvenye tuna yidiva nawa nawa asi nomvhura edi mbali kuna tugumu natuvenye, yipo nye ame nina kupandura mapangero aga gavali omu vana ligwasana vapaturure nomurudi edi. 

Ketameko tupu lyokwedi oku, Namibia naAngola katumwene omu kavakapatwilire murudi gwetu poOshikango ntani Katwitwi, siruwo oso Sarusungu ezi zakara asi kwagwanekedesa Namibia naAngola kupitira moRundu ano moAngola kupitira poCalai kavazipatwilire nkera. 

Mapangero gavali kwakere nosigongi moOndjiva momazuva 21 January omu vakaliyongere epatururo nomurudi yipo asi vantu vetu valigendere ntani ekuliko nalyo litameke moomu lyakere. 

Epangero lyaAngola kuna kutanta asi vadinguli vahepa kulikida yitundwamo yoCovid-19 yina kulikida asi muntu ogo kapi ana kara nokambumburu ntani mbapira zina kulikida asi muntu ogo vamuvendwa novendwa mbali docovid.

Ano owo nye vana kara asi kwavavendwa rumwe tupu, owo nava vatuma kevango lyokulikarera pwanyovelike omu navakalifutira vene, yimo ana kutanta Wakudumo. 

Agostino dos Santos, ogu kakere asi mukarelipo epangero lyaAngola, posiruwo sezegururo murudi ogu poSarusungu ntani Rundu –Calai kahundilire vaAngola asi vahepa kukwama nongendeseso doCovid-19 doyirongo eyi yivali. 

‘’Ose mukuruta murudi ogu, twahepa kusikisamo nayinye eyi vana kupura nayituninkisa tugwana epulisiro mokupita pomurudi. 

Ntani twahepa kukara nokakarata kovendwa zoCovid-19, zina kulikida asi ove vakuwenda ntani kuna kara hena kwato kambumburu. Mukurona govaporosi moKavango zoupumezuva Johanna Ngondo kageve magano asi vantu vaharuta nomurudi edi pwahana asi paveta.


2022-02-17  John Muyamba

Share on social media