Kansela woshikandjohoololo shaPembe Mathew Nanghama ota ti oshikandjohoololo shaye oshi na omhumbwe yomeva fiyo onena.

Meenghundafana a ninga naKundana Nanghama okwa hokolola ta ti moshikandjohoololo shaye omu yadi omikunda dihe na omeva okunwa mayela. T ti ovanhu ohava ende eendjila dile tava ka konga omeva komifima, ile keendungu shaashi omikunda dimwe kadi na eendungu nomifima dawana.

Nanghama okwa ti ombelewa yaye oya kala noku ninga eenghendambala opo i shivifile epangelo, ashike fiyo opapa kape na eshi sha ningwa po.

“Mopaife ngaha ovanhu ova tungilwa eemboola kepangelo opo va kale tava teke mo, ndele nee ope na oupyakadi wa kula shaashi eemboola odo ohadi di omeva malula unene .Onghee oshiwana paife osha xulifa po okuteka meembolo shaashi omeva oo itaa dulu oku nuwa kovanhu,” Nanghama ta ti.

Kansela okwa ti oshikandjohoololo shaye osho shimwe shi na omikunda dihapu diyadi omaumbo, odo dina ovanhu tava kwena enota efiku keshe. Ta ti oshiwana otashi nyenyeta unene sha hala oupomba vomeva.

“Ovakulupe novakainhu veli momateelelo navo ova kumwa komhumbwe ei yomeva shaashi oto hange omukainhu eli meteelelo lakula ta ende ondjilaileile tai ketambi lomeva lili kokule,” Nanghama ta ti.

Kansela okwa ti ovakainhu vena ounona va shona navo ove li tava mono oixuna shaashi ohava i komikunda doko kule oku kuna eepomba tava ka konga omeva okunwa ounona vavo shaashi okaana ka shona ita ka dulu okunwa omeva a dja mondungu ile momufima. Nanghama okwa weda po vali ta ti oshikandjohoololo shaye osha taalela omashongo ngaashi eepate, eefikola dihe na olusheno, oupangelo, nomakwatafano omewangandjo.

Kaensela okwa ti okwa ninga onghendambala oshivike sha djako opo a ye kombelewa ya ngoloneya waHangwena vo va kakundafane kombinga yonghalo yomhumbwe yomeva.

Ta ti Ngoloneya Walde Ndevashiya, okwa tokola opo e ke litalele ko yemwene. Nokwa udaneka kutya shiwana otashi ka pewa oupomba vomeva meendelele ngaashi tashi dulika.