Sha landula omanyenyeto okuza moshigwana kombinga yevi tali kuthwa pooha nomagumbo moshitopolwa shaShikoto, Kansela gwoshikandjohogololo shaNiipa Vilho Nuunyango okwa kumagidha aashingithi yomavi, ya kale taye ga kutha ko kule nomagumbo. ‘’Oshikandjohogololo shetu oshina omahala ga mbwalangandja ogendji, ngoka taga vulu oku kuthwa omavi, okuyanda omaupyakadhi gafa ngoka ga holokeke nale, ngaashi oku hanagula omagumbo gaantu,” ta ti ngaaka. Nuunyango ta ti, okukutha omavi okweeta omawupyakadhi ogendji, noga pumbwa oku indikwa. “Kandina uupyakadhi no mavi taga kuthwa, oshoka ohage tu kwathele wo nomavi goku tunga, naa shoka kutya Oniipa opo tayi ende tayi humu ko meho,” ta popi ngaaka. “Uupyakadhi wandje owu li ashike paanangeshefa mboka taya kondo oompango nomalandulathano ga yelithwa nawa moonzapo dhawo dhe pitikilo lyoku kutha evi,’’ ta ti ngaaka.
Ta ti, okuna okwiidhopa mo momawupyakadhi gantya ngiika, ngaashi ali alopotelwa anuwa pena yamwe ya li ya hala okukondja omolwa okukutha evi popepi nomagumbo. Kansela okwa gandja oshiholelwa she kango lyomulonga gwaShigambo, ta ti, ndyoka olyo ehala ewanawa okukuthwa evi, oshoka ota li gandja wo uuwanawa moshigwana, sho omalambo taga kala nomeya ethimbo.
“Ta ti, omeya ngoka otaga vulu okukala taga nuwa kiimuna oshowo okulongithwa mooproyeka dhimwe dhuunamapya, nonando osha indikwa manga omolwa omeya gefundja ngoka haga yi sigo omomagumbo,” ta fatulula ngaaka. Omwedhi gwa zi ko, omukuluntu gwomidhingoloko Timoteus Mufeti okwali a kaleke onzapo yelelolo lyaNdonga okukutha evi momukunda kOndando moshitopolwa Oniipa. Mufeti okwati, shoka okwali sha ningwa oshoka oompango nomalandulathano ga tulwapo gali ga kondwa. Okukutha evi momukunda Ondado, okwa kalekwa sigo omasiku 31 gaAguste numvo. Elelo lyopamuthigululwakalo olyili metifa okulongekidha noku kundathana nkene lyina okukandulapo uupyakadhi mboka.