ONGWEDIVA-Opolisi moshitopolwa Oshikoto Etitatu oya manga po aafekelwa yaali, sho ya li ya adhika noshipa shongaka shongushu yoN$50 000. Omukuluntu gwopolisi moshitopolwa shaShikoto Teopoline-Kalompo Nashikaku okwa lombwele Kundana ta ti aalumentu ye li yaali oya li ya mangwa po sho kwa li ya lopotwa kutya oya humbata oshipa shongaka.
Oshiningwanima shoka osha holoka lwopotundi 13h00 momundhingoloko gwOmuthiya sho kwa li kwa ningwa omboloka yomeendelelo.
Otaku hokololwa kutya aalumentu mboka okwa li ya monika taya landitha oshipa shongaka omanga inaaya tsikila ondjila.
Okwa li anuwa ya lopotwa kutya okwa li ya thindi ondjila yOmuthiya hoka ya li ya mangelwa. Opolisi okwa li ya pula oombapila dhokukala ya humbata ongaka ndjoka ihe kakwa li ye yi na.
Nashikaku okwa popi ta ti ongaka njyoka oyi na ongushu yoN$50 000. Ongaka oshinamwenyo shoka sha gamenwa moshilongo.
Oshipa shayo, ohashi longithwa iinima oyindji kaakwiilongo nomiilongo yokondje ngaashi okupanga.
Namibia omumvo gwa yi okwa lopota iipotha yi li 320 yi na sha nuufuthi woongaka, okuza omimvo ntano dha piti.
Ndhoka okwa li dha popiwa komupopiliko nomugandji gwomauyelele muuministeli womindhingoloko, omakuti nomatalelopo Romeo Muyunda momushangwa a li a pititha esiku oongaka kwa li dha dhimbulukwa muuyuni.
Ta ti, esiku ndyoka ohali dhimbulukiwa kehe omumvo momasiku 19 gaFebuluali.
“Okuza momumvo 2017 omwa lopotwa iipotha yoongaka yi li 43, 2018 yi li 62, 2019 yi li 96 , 2020 yili 59 omanga omuvo gwa yi mwa lopotwa iipotha yili 60,” ta ti ngaaka.
Muyunda okwa ti, oya ndhidhilike iiningwanima yaantu taya ikuthile ooveta dhokudhipaga iinamwenyo ya gamenwa yi li pombanda unene, momimvo dha piti.
vkaapanda@nepc.com.na
“Oongaka odha ndhidhilikwa dhi li pombanda tadhi longelwa omiyonena omolwongushu yoshipa shawo oshowo omayinga goompanda ngoka haga longithwa wo natango kiilongo yokondje,” ta popi ngaaka.
Ta gwedha po ta ti, iinamwenyo ngaashi oongaka, oompanda oshowo oondjamba oyo iihakanwa inene omolwoshimaliwa oshindji shoka hashi futwa. vkaapanda@nepc.com.na