Muyahi watolopo ya Windoko Owen Mahoto, yanyazwa kakuputelela likwambuyu Frans Kapofi, uhanile likakalezo zakuli ukona kufufela kwanda naha kasamulaho mapokola bapalelwa kumufumana. “Manzwi amubuso kuli nikona kufufela kwanda naha haki aniti, neninze nikandeka ni mapokola,” nekubulezi Mahoto, kanako yabonahala lwapili mwakhuta ya muatuli yomunyinyani mwa Widnoko. Kasamulaho muzekisi wamubuso Naomi Canniffe nabulelezi khuta kuli nekuli tata kumufumana kakuli naipatile, kacwalo mubuso ubona kuli ukona kufufela kwanda naha.

Canniffe nabulezi hape kuli likakalezo zatalimani nizona Mahoto kizetuna, kacwalo hakoni kulumelelwa kulibelela muzeko wahae kwande, kakuli akaswana ayo eza likezo zeswana. Mahoto ili manjinela natamilwe viki yefelile mi utalimana ni likakalezo zepeli zabulyangelino, kapa busholi. Yapili iama nako yaputelela Kapofi kumufa litaba zahae zakwapanka. Mubuso uakaleza kuli naipitisize kuba mubeleki wakwapanka mi nabulelezi Kapofi kuli nalemuhile litaba zakubata kushimbulula masheleñi mwasibulukelo sa hae, mi kuli ayemise zecwalo natokwa litaba zahae zakwapanka.

 Mahoto kiha zwelapili kuuzwa N$200 000 la 24 Muyana 2022. Mwamulatu wabubeli Mahoto ukulubelwa kuli na uzwize N$22 271 kwahotela ya Wenberg mwa Windoko. Kukulubelwa kuli la 19 Muyana 2022, nakolwisize mubeleki wakwahotela kuli nalifile sikoloti sahae, kakulumela masheleñi kamuhala, nihana ziba kuli nasika eza cwalo. Likakalezo zepeli libeilwe hamoho. Muatuli yomunyinyani Mutafela Likando nalemusize Mahoto kuli usana nitukelo yakukupa kuli alibelele taba yahae kwande simubuso. Taba neisizwe la 7 Ñulule 2022, kulumelela lipatisiso zasipokola kuzwelapili.