Oshiponga oshinene sha holoka Osoondaha  osha faalele oomwenyo dhaantu ye li yahamano, sho iihauto ya li ya londo ya li yi idhenge mumwe omutse nomutse. Sha ikwatelela kepeko lyopolisi sho lya pititha iiningwanima ya holoka mehuliloshiwike, oshiningwanima shoka osha holoka ethimbo lyongula mepandaanda enene pokati kOtjiwarongo nOkahandja moshitopolwa shOtjozondjupa.

Otaku hokololwa kutya oshiponga shoka osha holoka ashike ookilometa 25 muumbugantu wOtjiwarongo.

Oshiponga osha faalele wo aagundjuka yaali oshowo omukiintu gumwe nohanona ye. Okwa ndhindhilikwa natango mwa sile aapambele.

Opolisi kakwa li tayi vulu okupititha natango omadhina goonakusa oshoka aakwanezimo ayehe kakwa li ya tseyithilwa.  

Opolisi oya ti, poshiponga mpoka opwa li pwa zi aantu ya mona iiponga ya ka mona uuhaku koshipangelo, yamwe oye li monkalo yi nyanyaleka.

Otaku hokololwa kutya ohauto yoJetta ontokele ndjoka kwa li ya humbata aantu ye li yatano  mwa kwatelwa omuhingi okwa li yi idhenge mumwe  omutse nomutse nohauto yoGolf osiliveli.

Opolisi oya kumagidha oshigwana shi kale tashi hingi nuukeka okuyanda iiponga yombaandhilila.

Tayi ti, aahingi yoohauto inaya hingilila we, naya kondolole okuhinga kwawo.

“Iiponga yoludhi ndoka ohau yi holoka unene, una oohauto kwali tadhi hingililwa. Ohauto ngele otayi hingwa kashona ihe oshiponga tashi holoka ombaadhilila, ompito yaantu taya mono oshiponga ohayi kala oshona lela,” ta yi ngaaka.

Opolisi oya kumagidha wo aahingi ya kale taya simaneke omandhindhiliko gomoondjila, ngoka tage ya wilike nkene yena okuhinga oshowo mpoka yena okuhingila.

– vkaapanda@nepc.com.na