New Era Newspaper

New Era Epaper
Icon Collap
...
Home / Yamwe yomaatekulu 14 ye li moluhepo lwamemememe anuwa ohaya piti aatango kosikola

Yamwe yomaatekulu 14 ye li moluhepo lwamemememe anuwa ohaya piti aatango kosikola

2022-07-08  Victoria Kaapanda

Yamwe yomaatekulu 14 ye li moluhepo lwamemememe anuwa ohaya piti aatango kosikola

Victoria Kaapanda

luhepo ndoka lwa ponokela egumbo lyomukulupe gwomimvo 59, momukunda Okafa mEheke kalu shi kwi indhindhimikilwa kukehe.

Rakel Paulus okwa ti nonando ta tekula aatekulu ye 14 mboka a thigilwa koyana mboka kaaye na iiyemo yasha, kape na nando omutekulu gumwe ha mono omayambidhidho gasha okuza kepangelo omolwuuthemba mboka kaaye na.

“Aanona ayehe oya tala mopenzela yandje yuulema, ndjoka handi mono, nonando ihayi ya gwana. Oshimaliwa shandje shoka handi mono ohandi shi landa po oompumbwe dhomegumbo opo ndi vule okuhupitha aatekulu yandje,” ta fatulula ngaaka.

Ta popi kutya ooyina yaanona oye li koondoolopa, taya nyanga shawo shopepunda oshoka itaya vulu oku mu kalela opamwe naatekulu. Ta ti, ohashi lindimaneke omutima gwe ngele a tala aatekulu ye taya lala koombete dha dhikwa niiti, dhimwe onoodhopi omanga yamwe ya lala pevi powala,” ta popi ngaaka.

Paulus ta ti, aamati oya li ya ningi onkambadhala ndjoka oshoka inaya hala okulala pevi, osha nika oshiponga.

Pevi ohapu ende iinima oyindji mbyoka tayi vulu oku ya lya. “Otandi indile kaanamutimahenda ya yambidhidhe ndje nomatalashe nenge noombete nando oonkulu opo aatekulu yandje ya ze ko kiiti nomamanya ngoka ya tungu okuninga oombete oshowo mboka haya lala pevi,” ta indile ngaaka.

Paulus okwa gwedha po kutya oha longitha omeya taga zi kondama yomeya, ngoka he ya oku ga tula omuti ha pewa koshipangelo opo ga ze oongaga, oshoka kaye na opomba megumbo.

Omulongisikola Esther Nakale posikola Ondiamanda Combined School, mpoka hapu hiti aanona yomegumbo moka okwa ti, ota indile epangelo lyi yambidhidhe aanona mboka haye shi enditha nawa opo omandhilandhilo gawo kaaga nkundipalekwe konkalo. “Omu na aanona yatatu megumbo muka haya piti aluhe aatango, nonando onkalo ya taalela ondhigu, aluhe oye na oku ithanwa aatango. Otandi dhiladhila ngeno ya falwe nando okomihandjo pamwe onkalo tayi kala ohwepo,” ta gandja omadhiladhilo ge.

Nakale okwa ti, nonando ya kala taya hiti osikola noompadhi kondje, oonzapo dhawo ohadhi hokitha.

“Osikola yetu oya kala ngaa tayi yambidhidha aanona mboka nomizalo dhosikola nosho tuu,” ta popi ngaaka.

Ta ti, okwa li a ende omwenyo esiku limwe sho a li a talele po egumbo ndyoka ihe okwa li a adha ya tula po uutanga wumwe mboka wa li wa mena pooha dhegumbo, opo ya lye omuha oshoka kape na sha shokulya. Omukulupe okwa li a popi kutya nuumvo okwa Ii ngaa ya longo mepya, ihe inamu za iiyamba.

Sho onkundana ndjika kwa li ya pitithwa tango kiikundaneki yilwe, yamwe okwa li ya ningi onkambandhala yopetameko okuyambidhidha egumbo ndika.

Ehangano lyoRiya oshowo amushanga gwewawa lyaanyasha mongundu yoSwapo koshikondo shelongo Hofni Iipinge okwa li ya yambidhidha egumbo ndyoka nomakumbatha ge li gaheyali, iikusinga 14, oothewa oshowo uukwathitho waakadhona.

Oya li wo natango ya yambidhidhwa nokofa yiikutu komunamutimahenda gontumba. Mwene gwomukunda Okatha, Juuso Iipidhi okwa ti, onkalo yaanona mboka ihaya yambidhidhwa kepangelo omanga ye li moluhepo oye yi shi nawa.

“Okwa li twa kambadhala, sigo twa huulile kukansela ngoka a li e tu yamukula nawa kutya  aakuluntu yaanona mboka manga ye shiwike mpoka ye li naye ye ya gandje omaukwatya gaanona yawo opo ya vule okushangwa, ihe shoka kakwa li sha ningwa,” ta fatulula ngaaka.

Ta ti, omukulupe ita vulu okushangitha aanona oshoka ke na sha tashi ulike omaukwatya gaanona, okuyanda okugandja uuyele waali mondjila.

Kansela gwoshitopolwa Uukwiyuushona Andreas Amundjindi okwa koleke onkalo yomegumbo moka.

‘’Okwa li nda gandja omusholondondo ngoka kuuminsteli womagumbo, ihe shoka okwa li sha huulile mpoka omolwaakuluntu yaanona mboka inaaya thika,’’ ta fatulula ngaaka. Kansela ta ti, shoka oshi li pamulandu gokatendo kutya omutekuli iha vulu okuninga onzapo omanga aakuluntu yomunona ye li momwenyo.

“Ngeno okwa li aavali mboka taya thiki opo ya vule okugandja uuyelele womondjila waanona yawo, ngeno aanona mboka oya mona nale omakwatho,’’ kansela a fatulula ngaaka.

– vkaapanda@nepc.com.na


2022-07-08  Victoria Kaapanda

Share on social media