Oshipotha shaalumentu yane taya fekelelwa endhipago lyomukeleeli gomaliko ngoka a li a dhipagwa omanga e li miilonga omwendhi gwayi, osha undulilwa komasiku 18 Juli nuumvo.

Sha ikolelela kepeko lyopolisi yaNamibia aafekelwa yane moshipotha shedhipago lyomugameni gomaliko oya holoka mompangu ya mangestrata gwaNdangwa oshikando shotango Etiyali. Aafakelwa oya tothwamo onga Ananias Ananias (33), Wilhelm Shavuka (25), Joseph Antonio (29) na Amos Mungonena (30). 

Oya holoka komeho ga mangestrata Alice Gawanas taya tamanekelwa iipotha iyali shotango oshedhipago noshitiyali sheteyo lyegumbo nelalakano lyokuyaka.

Aalumentu mboka okwali ya tindilwa ombooloha opoya gandje ompito kopolisi yi manithe omakonakono.

Natango ope na aafekelwa yamwe moshipotha shika, no polisi oyili metifa okuyamanga po.

Omulumentu gwomimvo 29 ngoka a li omukeeleli gwomaliko okwa li a yahwa kaafuthi nokusa, ethimbo kwa li ya ponokele ondingosho tayi ithanwa Brazzaville yi li pomudhingoloko gwaShigambo, nokuya niimaliwa N$18 000, omwendhi gwa zi ko.

Sha ikolela komugandji gomauyelele moshitopolwa shaShikoto Ellen Nehale, oshiningwanima shoka osha holoka momukanda Okalunga momundhingoloko Oshigambo. Otaku hokololwa kutya aalumentu yeli yane okwa li ya ponokele ehala ndyoka lyomanwino, noku yaha omukeleli gomaliko nokusa ethimbo olyo tuu ndyoka.

Aalumentu mboka ye li yane, anuwa okwali ya tsikile okuya mondunda moka mwali muna omulandithi gomukiintu. Okwali anuwa ye mu pula a gandje ooshapi dhoshiketha shiimaliwa, nokutha mo iimaliwa.

Omukiintu ngoka anuwa ka kwali a ehamekwa, naafuthi okwali ya yi ontuku nohauto yoSedan.

Opolisi oya kala yili molukongo lwaamboka ya longo iilonga mbyoka. Opolisi yaNamibia onkene tayi tsikile okukumagidha oshigwana kaashi pungule iimaliwa oyindji momagumbo nenge momahala gomanwino.

Tayi ti, omauyelele ngoka ohaga taambathanwa sigo gathiki momakutsi gaafuthi. Anuwa omufuthi iha ponokele ehala nenge egumbo keena uuyelele wa shoka shili mo. 

vkaapanda@nepc.com.na