New Era Newspaper

New Era Epaper
Icon Collap
...
Home / Yatatu ya si miiponga yiihauto mOshikoto

Yatatu ya si miiponga yiihauto mOshikoto

2022-07-05  Victoria Kaapanda

Yatatu ya si miiponga yiihauto mOshikoto

Iiponga yiihauto ya holoka mehuulilo shiwike ya faalele oomwenyo dhaantu ye li yatatu omanga yakwawo yatatu ya li ya mono iiponga.

Sha ikolela komugandji gomauyelele moshitopolwa shaShikoto Inspector Ellen Nehale, aantu mboka yaali oya si sho lyatwa omanga gumwe a si mekandomo lyohauto.

“Mboka ya lyatwa anuwa kwa li taya ende kooha dhopate pomahala ga yooloka. Yaali yo muyo okwa li ya hulithile poomahala goshiponga omanga gumwe a li a ningi omunelago no kwa li a kamona uuhaku,” ta ti ngaaka. Nehala okwa ti, opolisi oya ndhindhilike kutya iiponga mbyoka okwa li ya holoka omolwa aahingi taya hingi nuuhasha omanga ye li kohi yiikolitha.

“Ota tu tsikile okukumagidha noku ganda aahingi ya hulithe po okuhinga omanga yanwa iikolitha, okuyanda iiponga,” ta kumagidha ngaaka. Nehale natango okwa li a kumagidha wo aayenda nandjila ya kale taya ende ko kule noopate okwiikelela kiiponga yolundhi ndoka.

Ta kumagidha kutya aahingi naya kale aluhe taya hingi nuukeka.

Oshiponga shimwe shomwaa mbyoka ya faalele oomwnyo ndhoka noku monitha aantu iiponga, osha holoka momundhingoloko Onayena momukunda Oniiwe.

Oshiningwanima shoka anuwa osha holoka lwopotundi 20h00.

Omulumentu gwomimvo 42 Medusalem Tuyoleni okwa li a pumwa kohauto yoFord Ranger, noku sa ethimbo olyo tuu ndyoka, pethimbo kwa li taya ende nomumwayina gwomumati kooha ndho pate. Omukiintu ngoka anuwa a shiwika onga Kalista ashike gwomimvo 40 okwa li a si eso lyinyanyaleka sho kwa li a pumwa koshihauto, eta lyatwa natango koshihauto oshitiyali, shali konima. Otaku hokololwa kutya oshingwanima shoka okwa li sha holoka momundhingoloko gwOmuthiya.

Ta hokolola kutya omukiintu ngoka anuwa okwa li ta ende kooha ndho pate sho a li a pumwa kohauto yoToyota e ta gwile mo pate. Ta ti, ohauto ndyoka ya li ya landula oToyota monima yoFortuner, okwa li natango ya ende kombanda yolutu lwomukiintu ngoka.

Aahingi ayehe yaali okwa li ya mangwa po oshoka oya li kohi yiikolitha nonando oye na omikanda dhokuhinga.

Omulumentu gwomimvo 30 oku li ta mono uuhaku moshipangelo sho a lyatwa noku teka okugulu, kohauto tayi hingwa komuhingi keena mukanda.

Oshiningwanima anuwa osha holoka mo pate yi li pokati kOlukonda nOnethindi.

Tyicongo Balo Kapolo  gwomimvo 28 okwa si moshiponga shohauto sho oshihauto moka kwa li a londa shi indhenge mumwe nashikwao omutse nomutse.

Oshingwanima shoka okwa li sha holoka momundhingoloko gUuhama, mondjila onene pokati kOndangwa nOmuthiya.

vkaapanda@nepc.com.na


2022-07-05  Victoria Kaapanda

Share on social media